വര്‍ക്കലയ്ക്കടുത്ത് മകനുമായി വഴക്കിട്ട് കിണറ്റില്‍ ചാടിയ സ്ത്രീയെ അഗ്‌നിരക്ഷാ സേനയും നാട്ടുകാരും ചേര്‍ന്ന് രക്ഷപ്പെടുത്തി. ഇടവ മാന്തറ അര്‍ച്ചന നിവാസില്‍ പ്രശോഭന(63)യെയാണ് രക്ഷിച്ചത്. ഇന്നലെ രാവിലെയായിരുന്നു സംഭവം.

മകനുമായി വഴക്കിട്ട് കിണറ്റില്‍ ചാടിയെന്നാണ് സൂചനകള്‍. വീടിനു തൊട്ടുചേര്‍ന്ന പറമ്പിലെ കിണറ്റിലാണ് ഇവരെ കണ്ടത്. 60 അടിയോളം താഴ്ചയുള്ള കിണറ്റില്‍ 40 അടിയോളം വെള്ളവുമുണ്ടായിരുന്നു. പുലര്‍ച്ചെയാണ് പ്രശോഭന കിണറ്റില്‍ അകപ്പെട്ടതെന്ന് സംശയിക്കുന്നു. കിണറിനുള്ളില്‍ നിന്നുള്ള നിലവിളി കേട്ടാണ് പ്രദേശവാസികള്‍ സംഭവമറിഞ്ഞത്.

കിണറിലെ മോട്ടോറിന്റെ പൈപ്പില്‍ പിടിച്ച് വശത്ത് ചവിട്ടി നില്‍ക്കുന്ന നിലയിലാണ് പ്രശോഭനയെ കണ്ടത്. പിന്നാലെ നാട്ടുകാരായ രണ്ടുപേര്‍ കിണറ്റിലിറങ്ങി പ്രശോഭന താഴ്ന്നുപോകാതെ താങ്ങിനിര്‍ത്തി. ഇതിന് പിന്നാലെ വിവരമറിഞ്ഞ് അഗ്‌നിരക്ഷാസേനയെത്തി റോപ്പും നെറ്റും ഉപയോഗിച്ച് ഇവരെ കരയ്‌ക്കെത്തിക്കുകയായിരുന്നു. പിന്നാലെ ആശുപത്രിയില്‍ പ്രവേശിപ്പിച്ചു.