ബിഗ് ബോസ് സീസണ്‍ ഏഴ് ആരംഭിച്ച് ഒരാഴ്ചയ്ക്കുള്ളില്‍ത്തന്നെ ബിഗ് ബോസ് വീട്ടിനുള്ളില്‍ പ്രശ്‌നങ്ങളും ആരംഭിച്ചു. ഓമനപ്പേര് നല്‍കാന്‍ പറഞ്ഞപ്പോള്‍ രേണു സുധിക്ക് ഗായകനായ അക്ബര്‍ സെപ്റ്റിക് ടാങ്ക് എന്ന പേര് നല്‍കിയതിനെതിരെ വലിയ വിമര്‍ശനം ഉയര്‍ന്നിരുന്നു. വിഷയത്തില്‍ അവതാരകനായ മോഹന്‍ലാലിന്റെ പ്രതികരണം എന്തായിരിക്കുമെന്നായിരുന്നു ഏവരും ഉറ്റുനോക്കിയത്. ഇപ്പോഴിതാ അക്ബറിന് ശിക്ഷ നല്‍കിയിരിക്കുകയാണ് അദ്ദേഹം.

'അക്ബര്‍ എന്താണ് അങ്ങനെ പറയാന്‍ കാരണം. ഈ ഷോ എന്ന് പറയുന്നത് ലക്ഷക്കണക്കിനാളുകള്‍ കാണുന്നതാണ്. നിങ്ങളെ ഇഷ്ടപ്പെടുന്ന ഒരുപാടാളുകളുണ്ട്. അവരെ ഇഷ്ടപ്പെടുന്ന ഒരുപാടാളുകളുണ്ട്. നിങ്ങളെ ഇഷ്ടപ്പെടാത്ത ഒരുപാടാളുകളുണ്ട്.' എന്ന് മോഹന്‍ലാല്‍ പറയുമ്പോള്‍ 'അതെനിക്ക് മോശമായി തോന്നി, ചേച്ചിയോട് സോറി പറഞ്ഞു' എന്ന് അക്ബര്‍ ഖാന്‍ മറുപടി നല്‍കി.

തുടര്‍ന്ന് എന്താണ് രേണുവിന് പറയാനുള്ളതെന്ന് മോഹന്‍ലാല്‍ ചോദിച്ചു. 'അതുകേട്ടപ്പോള്‍ എല്ലാവരുടെയും മുന്നില്‍ ചമ്മിപ്പോയി ലാലേട്ടാ. വേറെന്തെങ്കിലുമായിരുന്നെങ്കില്‍ കുഴപ്പമില്ലായിരുന്നു. ഇത് എല്ലാവരുടെയും മുന്നില്‍ ചമ്മി നാറി ഉരുകിപ്പോയി. അക്ബര്‍ സോറി പറഞ്ഞു. ആ വിഷമം മാറില്ലല്ലോ. ലോകം മൊത്തം കാണുകയല്ലേ' എന്നായിരുന്നു രേണുവിന്റെ മറുപടി.

'അങ്ങനെ സംഭവിച്ചതില്‍ എനിക്കും വിഷമമുണ്ട്. അക്ബര്‍ ഒരു കാര്യം ചെയ്യുക, അടുത്ത ഒരാഴ്ചയ്ക്കുള്ളില്‍ രേണുവിനെക്കൊണ്ട് നല്ലത് പറയിപ്പിക്കുക. അതാണ് അക്ബറിനുള്ള ശിക്ഷ. അല്ലെങ്കില്‍ അടുത്ത പണി അക്ബറിന് കിട്ടും.' മോഹന്‍ലാല്‍ വ്യക്തമാക്കി.