സംസ്ഥാനത്ത് വരും ദിവസങ്ങളില്‍ ട്രെയിന്‍ സര്‍വീസില്‍ നിയന്ത്രണം ഉണ്ടാകുമെന്ന് അധികൃതര്‍. കോട്ടയം യാര്‍ഡിലെ അറ്റകുറ്റപ്പണിയെ തുടര്‍ന്ന് 16 മുതല്‍ 31 വരെയുള്ള ദിവസങ്ങളിലെ ട്രെയിന്‍ ഗതാഗതത്തിലാണ് നിയന്ത്രണമുള്ളത്. കോട്ടയം നിലമ്പൂര്‍ എക്‌സ്പ്രസ് അഞ്ച് ദിവസത്തേക്ക് ഭാഗികമായി റദ്ദാക്കി. കോട്ടയം നിലമ്പൂര്‍ ഡെയ്‌ലി എക്‌സ്പ്രസ് 16,17,19,23,29 തീയതികളില്‍ ഏറ്റുമാനൂരില്‍ നിന്നായിരിക്കും പുറപ്പെടുക. കോട്ടയം ഏറ്റുമാനൂര്‍ റൂട്ടില്‍ സര്‍വീസുണ്ടായിരിക്കില്ല.

26ാം തീയതിയിലെ മംഗളൂരു തിരുവനന്തപുരം നേര്‍ത്ത് സ്‌പെഷ്യല്‍ ട്രെയിന്‍ 30 മിനിട്ട് വൈകിയോടും. തെലങ്കാനയിലെ റെയില്‍ ലൈനിലും അറ്റകുറ്റപ്പണികള്‍ നടക്കുന്നുണ്ട്. ജോലികളുടെ ഭാഗമായി ഒക്ടോബറില്‍ കേരളത്തിലൂടെയുള്ള ആറ് ട്രെയിനുകളും റദ്ദാക്കിയിട്ടുണ്ട്. ഒക്ടോബര്‍ 10,12 തീയതികളിലെ ഗോരഖ്പൂര്‍ തിരുവനന്തപുരം നോര്‍ത്ത് രപ്തിസാഗര്‍ എക്‌സ്പ്രസ് റദ്ദാക്കിയിട്ടുണ്ട്. 14,15 തീയതികളിലെ തിരുവനന്തപുരം നോര്‍ത്ത് ഗോരഖ്പൂര്‍ രപ്തിസാഗര്‍ എക്‌സ്പ്രസും റദ്ദാക്കി.

ഒക്ടോബര്‍ 13,16 തീയതികളില്‍ തിരുവനന്തപുരം നോര്‍ത്ത് കോര്‍ബ സൂപ്പര്‍ഫാസ്റ്റ് എക്‌സ്പ്രസ് റദ്ദാക്കി. 15,18 തീയതികളില്‍ പെയിംഗ് ട്രെയിനും റദ്ദാക്കിയിട്ടുണ്ട്. ഒക്ടോബര്‍ 13ലെ ബറൗനി എറണാകുളം ജംഗ്ഷന്‍ രപ്തിസാഗര്‍ എക്‌സ്പ്രസും റദ്ദാക്കിയിട്ടുണ്ട്. 17ാം തീയതിയിലെ തിരിച്ചുള്ള ട്രെയിനും റദ്ദാക്കി. യാത്രക്കാര്‍ റെയില്‍ വണ്‍ ആപ്പ് നോക്കി സമയം പരിശോധിച്ചതിനു ശേഷം മാത്രം യാത്രകള്‍ക്കുള്ള ക്രമീകരണങ്ങള്‍ നടത്തണമെന്ന് റെയില്‍വേ അധികൃതര്‍ അറിയിച്ചു.