ചിങ്ങമാസ പൂജയ്ക്കായി ശബരിമല ക്ഷേത്രനട നാളെ വൈകുന്നേരം തുറക്കും. വൈകുന്നേരം അഞ്ചിന് മേല്‍ശാന്തി അരുണ്‍കുമാര്‍ നമ്പൂതിരി ശ്രീകോവില്‍ തുറന്ന് തിരിതെളിയിക്കും. തന്ത്രി കണ്ഠര് മഹേഷ് മോഹനര് മുഖ്യകാര്‍മികത്വം വഹിക്കുകയും ചെയ്യും.

ചിങ്ങപ്പുലരിയായ മറ്റെന്നാള്‍ മുതല്‍ ഈ മാസം 21 വരെ പൂജകള്‍ ഉണ്ടാകും. എല്ലാ ദിവസവും ഉദയാസ്തമനപൂജ, പടിപൂജ, കളഭാഭിഷേകം, പുഷ്പാഭിഷേകം എന്നിവ ഉണ്ടാകും. 17ന് ചിങ്ങപ്പുലരിയില്‍ ഐശ്വര്യ സമൃദ്ധിക്കായി ലക്ഷാര്‍ച്ചന നടക്കും.

ഈ മാസം 21ന് രാത്രി 10ന് നട അടയ്ക്കുന്നതാണ്. ഓണം പൂജകള്‍ക്കായി സെപ്റ്റംബര്‍ മൂന്നിന് വൈകിട്ട് 5ന് തുറക്കും. സെപ്റ്റംബര്‍ 4 മുതല്‍ 7 വരെയും അയ്യപ്പ സന്നിധിയില്‍ ഓണ സദ്യകളുണ്ടാകും. സെപ്റ്റംബര്‍ ഏഴിന് ശബരിമല നട അടയ്ക്കുന്നതാണ്.