എഡിഎം നവീന്‍ ബാവുവിന്റെ മരണത്തില്‍ പുനരന്വേഷണം വേണമെന്ന കുടുംബത്തിന്റെ പുതിയ ഹര്‍ജിയില്‍ പൊലീസ് ഇന്ന് കോടതിയില്‍ റിപ്പോര്‍ട്ട് സമര്‍പ്പിക്കും. പ്രത്യേക അന്വേഷണസംഘം സമര്‍പ്പിച്ച കുറ്റപത്രത്തിലെ 13 പിഴവുകള്‍ ചൂണ്ടിക്കാട്ടിയാണ് കുടുംബം പുനരന്വേഷണമെന്ന ആവശ്യം വീണ്ടും ഉന്നയിച്ചത്.

അന്വേഷണസംഘം കുറ്റപത്രം സമര്‍പ്പിച്ചത് കണ്ണൂര്‍ ജെഎഫ്‌സിഎം കോടതിയിലായിരുന്നു . പ്രത്യേക അന്വേഷണ സംഘത്തിന്റെ കുറ്റപത്രത്തില്‍ പ്രതിക്ക് രക്ഷപ്പെടാനുള്ള നിരവധി പഴുതുകളുണ്ടെന്നും നവീന്‍ ബാബുവിനെ അഴിമതിക്കാരനായി ചിത്രീകരിക്കാനുള്ള മനപ്പൂര്‍വമായ ശ്രമം നടത്തിയെന്നും ഹരജിയില്‍ കുടുംബം ചൂണ്ടിക്കാട്ടിയിരുന്നു.

തുടരന്വേഷണം എന്ന കുടുംബത്തിന്റെ ആവശ്യത്തോട് പൊലീസ് അനുകൂല നിലപാട് സ്വീകരിക്കാന്‍ സാദ്ധ്യതയില്ല. പ്രതിയെ രക്ഷപ്പെടുത്താനായി സാക്ഷികളെ കൃത്രിമമായി ഉണ്ടാക്കിയെന്നും ഫോണ്‍ അടക്കമുള്ള ശാസ്ത്രീയ തെളിവുകള്‍ ശേഖരിച്ചില്ലെന്നും ഹര്‍ജിയില്‍ ആരോപണമുയരുന്നുണ്ട്. ഹര്‍ജി ഫയലില്‍ സ്വീകരിച്ച കോടതി കുടുംബത്തിന്റെ ആവശ്യത്തില്‍ നിലപാട് അറിയിക്കാനായി പൊലീസിന് ഇന്നത്തേക്ക് സമയം അനുവദിക്കുകയായിരുന്നു.