പൂജപ്പുരയിൽ ജയിൽ വകുപ്പിന്റെ കഫറ്റീരിയയിൽ മോഷണം. നാല് ലക്ഷം രൂപയാണ് ജയിൽവകുപ്പിന്റെ ഭക്ഷണശാലയിൽ നിന്ന് മോഷണം പോയത്. ഇന്ന് ട്രഷറിയിൽ അടയ്‌ക്കാനായി സൂക്ഷിച്ചിരുന്ന പണമാണ് നഷ്‌ടമായിരിക്കുന്നത്. അതേസമയം സ്ഥലത്ത് സിസിടിവി പ്രവർത്തനക്ഷമമല്ല എന്ന് പൊലീസ് അറിയിച്ചു.

കഫ്റ്റീരിയയ്ക്ക് ഉള്ളില്‍ സൂക്ഷിച്ചിരുന്ന താക്കോല്‍ ഉപയോഗിച്ച് പിന്‍വശത്തെ ഓഫിസ് കെട്ടിടത്തില്‍ സൂക്ഷിച്ചിരുന്ന പണം മോഷ്ടിക്കുകയായിരുന്നു. പൂജപ്പുര-ജഗതി റോഡിന്റെ അരികിലായാണ് കഫറ്റീരിയ. സ്ഥാപനത്തിന്റെ താക്കോൽ സൂക്ഷിക്കുന്ന ചില്ലുകൂട് തകർത്ത് താക്കോലെടുത്ത് ഓഫീസ് റൂമിൽ കയറുകയായിരുന്നു . കഫ്റ്റീരിയയുടെ പിന്‍വാതില്‍ പൂട്ട് തകര്‍ത്താണ് അകത്തു കയറിയത്. കഴിഞ്ഞ മൂന്ന് ദിവസത്തെ കളക്ഷനാണ് നഷ്ടമായത്. മോഷണത്തിന് പിന്നിൽ തടവുകാരനായ മുൻ ജീവനക്കാരനാണെന്ന സംശയം പൊലീസിനുണ്ട്. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.