കണ്ണൂര്‍ കുറ്റിയാട്ടൂര്‍ ഉരുവച്ചാലില്‍ യുവതിയെ തീ കൊളുത്തി കൊല്ലാന്‍ ശ്രമം. കുട്ടാവ് സ്വദേശിയായ ജിജേഷ് (40) ആണ് പ്രവീണയെ (35) തീകൊളുത്തിയത്. ബുധനാഴ്ച ഉച്ചകഴിഞ്ഞു രണ്ടു മണിയോടെയാണ് സംഭവം. ഇരുവര്‍ക്കും സാരമായി പൊള്ളലേറ്റു. പ്രവീണയുടെ ഭര്‍ത്താവിന്റെ അച്ഛനും ഭര്‍ത്താവിന്റെ സഹോദരിയുടെ മകളുമാണ് ഈ സമയം വീട്ടിലുണ്ടായിരുന്നത്.

വെള്ളം ചോദിച്ചെത്തിയ ജിജേഷ്, വീടിനു പിറകുവശത്തുണ്ടായിരുന്ന പ്രവീണയുടെ മേല്‍ പെട്രോള്‍ ഒഴിച്ചു തീ കൊളുത്തുകയായിരുന്നു. ഇതിനിടെ ജിജേഷിനും പൊള്ളലേറ്റു. ബഹളം കേട്ടെത്തിയ നാട്ടുകാരാണ് തീയണച്ച് ഇരുവരേയും പരിയാരം മെഡിക്കല്‍ കോളജ് ആശുപത്രിയില്‍ എത്തിച്ചത്. പ്രവീണയ്ക്ക് സാരമായി പൊള്ളലേറ്റിട്ടുണ്ട്.

പ്രവീണയുടെ ഭര്‍ത്താവിന്റെ വീടാണ് ഉരുവച്ചാലില്‍. ഭര്‍ത്താവ് വിദേശത്താണ്. ഇവര്‍ക്ക് ഒരു മകളുണ്ട്. സ്വന്തം വീട് കുട്ടാവാണ്. ഒരേ നാട്ടുകാരായ യുവാവും യുവതിയും നേരത്തെ അറിയുന്നവരാണെന്നാണ് ലഭിക്കുന്ന വിവരം. എന്നാല്‍ അക്രമണത്തിനു കാരണം എന്താണെന്ന് വ്യക്തമല്ല. പൊലീസ് അന്വേഷണം പുരോഗമിക്കുകയാണ്.