രണ്ട് ദിവസത്തെ കേരള സന്ദര്‍ശനായി കേന്ദ്ര അഭ്യന്തര മന്ത്രി അമിത് ഷാ ഇന്ന് രാത്രി കൊച്ചിയിലെത്തും. നാളെ രാവിലെ 10 പാലാരിവട്ടം റിനൈ ഹോട്ടലില്‍ നടക്കുന്ന ബി.ജെ.പി സംസ്ഥാന നേതൃയോഗം ഉദ്ഘാടനം ചെയ്യും.

ബി.ജെ.പി സംസ്ഥാന പ്രഭാരി പ്രകാശ് ജാവദേകര്‍, സഹപ്രഭാരി അപരാജിത സാരംഗി, സംസ്ഥാന കോര്‍ കമ്മിറ്റി അംഗങ്ങള്‍, സംസ്ഥാന ഭാരവാഹികള്‍, സംസ്ഥാന വക്താക്കള്‍ എന്‍.ഡി.എ സംസ്ഥാന കോ- ചെയര്‍മാന്‍ മോര്‍ച്ച സംസ്ഥാന പ്രസിഡന്റുമാര്‍, മേഖല പ്രസിഡന്റുമാര്‍ മേഖല സംഘടന സെക്രട്ടറിമാര്‍, മേഖല -ജില്ലാ പ്രഭാരിമാര്‍, ജില്ല പ്രസിഡന്റുമാര്‍ അടക്കമുള്ള മുതിര്‍ന്ന കാര്യകര്‍ത്താക്കളാണ് സംസ്ഥാന നേതൃയോഗത്തില്‍ പങ്കെടുക്കുന്നത്.
അതേസമയം കഴിഞ്ഞ മാസവും അമിത്ഷാ കേരളത്തില്‍ വന്നിരുന്നു. ബിജെപി സംസ്ഥാന കമ്മറ്റി ഓഫീസ് ഉദ്ഘാടനത്തിനാണ് ജൂലൈ 11ന് തിരുവനന്തപുരത്തെത്തിയത്. തുടര്‍ന്ന് പുത്തരിക്കണ്ടം മൈതാനിയില്‍ നടന്ന 36,000 വാര്‍ഡ് തല നേതാക്കള്‍ പ?ങ്കെടുത്ത നേതൃസംഗമം അമിത് ഷാ ഉദ്ഘാടനം ചെയ്തു. തിരുവനന്തപുരം, കൊല്ലം, പത്തനംതിട്ട, ആലപ്പുഴ എന്നീ നാല് റവന്യൂ ജില്ലകളിലെ വാര്‍ഡ് സമിതി അംഗങ്ങളാണ് ഇതില്‍ പങ്കെടുത്തത്.

മറ്റു പത്ത് റവന്യൂ ജില്ലകളിലെ അഞ്ചംഗ വാര്‍ഡ് സമിതി അംഗങ്ങളും പഞ്ചായത്ത് മുതല്‍ ജില്ലാ തലം വരെയുള്ള നേതാക്കളും വെര്‍ച്വലായും പങ്കെടുത്തിരുന്നു. തുടര്‍ന്ന് കണ്ണൂര്‍ തളിപ്പറമ്പ് രാജരാജേശ്വര ക്ഷേത്രത്തില്‍ ദര്‍ശനം നടത്തുകയും ചെയ്തു.