കോണ്‍ഗ്രസിന്റെ ചരിത്രത്തിലെ ഇത്ര ജീര്‍ണമായൊരു അദ്ധ്യായം ഇതുവരെ ഉണ്ടായിട്ടില്ലെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന്‍. പാലക്കാട് എംഎല്‍എ രാഹുല്‍ മാങ്കൂട്ടത്തിലിന്റെ രാജി കോണ്‍ഗ്രസുകാരുള്‍പ്പെടെ കേരളം ഒറ്റക്കെട്ടായി ആവശ്യപ്പെട്ട കാര്യമാണെന്ന് അദ്ദേഹം പറഞ്ഞു.

ആര് വിചാരിച്ചാലും രാഹുലിനെ സംരക്ഷിക്കാന്‍ പറ്റില്ലെന്നും പെരുമഴപോലെ പരാതികള്‍ വന്നുകൊണ്ടിരിക്കുകയാണെന്നും അദ്ദേഹം പറഞ്ഞു. വേറെ ആരുടേതൊക്കെ വരുമെന്ന് കാത്തിരുന്ന് കാണാമെന്നും അദ്ദേഹം കൂട്ടിച്ചേര്‍ത്തു.'കോണ്‍ഗ്രസ് നേതാക്കന്മാരുള്‍പ്പെടെ കേരളം ഒറ്റക്കെട്ടായി ആവശ്യപ്പെട്ടത് രാഹുല്‍ മാങ്കൂട്ടത്തില്‍ എംഎല്‍എ സ്ഥാനം രാജിവെക്കണമെന്നാണ്. സസ്‌പെന്‍ഷനിലൂടെ പ്രശ്‌നം അവസാനിപ്പിക്കുമെന്നാണ് പറഞ്ഞുകേട്ടത്. ലോകചരിത്രത്തില്‍ തന്നെ ഇതുപോലൊരു സംഭവം അപൂര്‍വമാണ്. ക്രിമിനല്‍വാസനയോടെ നടത്തിയിട്ടുള്ള ലൈംഗിക പീഡനം. ഇതിനെതിരായി കോണ്‍ഗ്രസുള്‍പ്പെടെയുള്ള ജനം ഒറ്റക്കെട്ടായി പ്രതികരിച്ചു. എന്താണ് കോണ്‍ഗ്രസുകാര്‍ എടുക്കുന്ന നിലപാട് എന്നാണ് ജനം ഉറ്റുനോക്കുന്നത് എം.വി. ഗോവിന്ദന്‍ പറഞ്ഞു.

കോണ്‍ഗ്രസിന്റെ ചരിത്രത്തിലെ ഇത്ര ജീര്‍ണമായൊരു അദ്ധ്യായം ഇതുവരെ ഉണ്ടായിട്ടില്ല. അത്തരം ഒരു കാര്യം മറ്റുള്ള കാര്യങ്ങളുമായി താരതമ്യം ചെയ്യേണ്ടതില്ല. ചില ആളുകളെ സംരക്ഷിക്കാന്‍ വേണ്ടിയിട്ടാണ് അത്തരത്തിലുള്ള താരതമ്യം ഉണ്ടാകുന്നതെന്നും എംവി ഗോവിന്ദന്‍ കൂട്ടിച്ചേര്‍ത്തു. രാഹുല്‍ മാങ്കൂട്ടത്തില്‍ രാജിവെച്ചാലും ഇല്ലെങ്കിലും തങ്ങള്‍ക്ക് ഒരു ഗുണവും ഇല്ലെന്നും അദ്ദേഹം പറഞ്ഞു.