പ്രായപൂര്‍ത്തിയാകാത്ത പെണ്‍കുട്ടിക്ക് നേരെ ലൈംഗികാതിക്രമം നടത്തിയ കേസിലെ പ്രതിക്ക് 78 വര്‍ഷം കഠിനതടവും 1,15,000 രൂപ പിഴയും ശിക്ഷ വിധിച്ച് കോടതി. ഇരിങ്ങാലക്കുട എസ്എന്‍പുരം ചെന്തെങ്ങ് ബസാര്‍ സ്വദേശി പൈനാട്ട് പടിവീട്ടില്‍ ഇബ്രാഹിമിനെയാണ് (64) പോക്‌സോ നിയമം, ഇന്ത്യന്‍ ശിക്ഷാനിയമം എന്നിവയിലെ വിവിധ വകുപ്പുകള്‍ പ്രകാരം ശിക്ഷിച്ചത്. വടക്കാഞ്ചേരി ഫാസ്റ്റ് ട്രാക്ക് സ്‌പെഷ്യല്‍ കോടതി ജഡ്ജി ആര്‍ മിനി ആണ് ശിക്ഷ വിധിച്ചത്.

പിഴത്തുക അതിജീവിതയ്ക്ക് നല്‍കും. കൂടാതെ കേസിന്റെ സ്വഭാവം പരിഗണിച്ച് അതിജീവിതയ്ക്ക് സംഭവിച്ച മാനസിക ശാരീരികാഘാതങ്ങള്‍ക്കും പുനരധിവാസത്തിനുമായി കേരള വിക്ടിം കോംപന്‍സേഷന്‍ സ്‌കീം പ്രകാരം നഷ്ടപരിഹാരം നല്‍കുന്നതിന് തൃശൂര്‍ ജില്ലാ ലീഗല്‍ സര്‍വീസസ് അതോറിറ്റിക്ക് നിര്‍ദേശവും നല്‍കിയിട്ടുണ്ട്.

2023 ജൂണ്‍ മാസം മുതല്‍ ജൂലായ് മാസം വരെയുള്ള കാലയളവില്‍ പ്രതി പല തവണകളിലായി പെണ്‍കുട്ടിയെ ലൈംഗികമായി പീഡിപ്പിച്ചുവെന്നാണ് കേസ്. ഇരിങ്ങാലക്കുട പൊലീസ് സ്‌റ്റേഷനിലെ അന്നത്തെ എസ്എച്ച്ഒ ആയിരുന്ന അനീഷ് കരീം, എസ്‌ഐ ആയിരുന്ന ഷാജന്‍ എംഎസ്, ജിഎസ്‌ഐ സുധാകരന്‍ കെആര്‍, വനിതാ പൊലീസ് സ്‌റ്റേഷന്‍ എസ്‌ഐ കൃഷ്ണ പ്രസാദ് എന്നിവര്‍ ചേര്‍ന്നാണ് കേസന്വേഷിച്ചത്. എസ്എച്ച്ഒ അനീഷ് കരീം ആണ് അന്വേഷണം പൂര്‍ത്തിയാക്കി പ്രതിക്കെതിരെ കുറ്റപത്രം സമര്‍പ്പിച്ചത്. പ്രോസിക്യൂഷന് വേണ്ടി സ്‌പെഷ്യല്‍ പബ്ലിക് പ്രോസിക്യൂട്ടര്‍ അഡ്വ. ഇഎ സീനത്ത് ഹാജരായി. ജിഎഎസ്‌ഐ ഗീത പിആര്‍, ഇരിങ്ങാലക്കുട സിപിഒ കൃഷഅണദാസ് എന്നിവര്‍ പ്രോസിക്യൂഷന്‍ നടപടികള്‍ ഏകോപിപ്പിച്ചു.