തര്‍ക്കത്തിനൊടുവില്‍ ഭാര്യയെയും ഭാര്യാമാതാവിനെയും കൊലപ്പെടുത്തി യുവാവ്
ജന്മദിന സമ്മാനങ്ങളുടെ പേരിലുണ്ടായ തര്‍ക്കത്തെത്തുടര്‍ന്ന് ഭാര്യയെയും ഭാര്യാമാതാവിനെയും കൊലപ്പെടുത്തി യുവാവ്. ഡല്‍ഹി രോഹിണിയില്‍ ഇന്നലെയാണ് സംഭവം നടന്നത്. മകന്റെ ജന്മദിനത്തിന് രണ്ടുകുടുംബങ്ങളും നല്‍കിയ സമ്മാനങ്ങളുടെ പേരിലായിരുന്നു തര്‍ക്കം. സംഭവത്തില്‍ യോഗേഷ് സേഗാള്‍ എന്ന യുവാവ് അറസ്റ്റിലായി.
കുസും സിന്‍ഹ (63), മകള്‍ പ്രിയ സേഗാള്‍ (34) എന്നിവരാണ് കൊല്ലപ്പെട്ടത്. പ്രിയയുടെ സഹോദരന്‍ മേഘ് സിന്‍ഹ പൊലീസിനെ വിവരമറിയിക്കുകയായിരുന്നു. കൊച്ചുമകന്‍ ചിരാഗിന്റെ ജന്മദിനം ആഘോഷിക്കാനായി ഓഗസ്റ്റ് 28നാണ് കുസും പ്രിയയുടെ വീട്ടിലെത്തിയത്.
ആഘോഷ പരിപാടികള്‍ നടക്കുന്നതിനിടെ സമ്മാനങ്ങളെച്ചൊല്ലി യോഗേഷും പ്രിയയുമായി തര്‍ക്കമുണ്ടായി. തര്‍ക്കം പരിഹരിക്കുന്നതിനായി കുസും പ്രിയയുടെ വീട്ടില്‍ തുടരുകയായിരുന്നു.
ഇന്നലെ മേഘ് മാതാവിനെ വിളിക്കാനായി ശ്രമിച്ചെങ്കിലും ഫോണില്‍ ലഭിച്ചില്ലെന്ന് പൊലീസ് പറഞ്ഞു. തുടര്‍ന്ന് ഇയാള്‍ പ്രിയയുടെ വീട്ടിലെത്തിയപ്പോള്‍ വാതില്‍ അകത്തുനിന്ന് അടച്ചിരിക്കുന്നതായി കണ്ടു. വാതില്‍ക്കല്‍ രക്തക്കറയുമുണ്ടായിരുന്നു. തുടര്‍ന്ന് മേഘ് ബന്ധുക്കളെ വിവരമറിയിക്കുകയും വാതില്‍ തകര്‍ത്ത് അകത്ത് കടക്കുകയുമായിരുന്നു.
മുറിയില്‍ രക്തത്തില്‍ കുളിച്ച നിലയില്‍ മാതാവിന്റെയും സഹോദരിയുടെയും മൃതദേഹങ്ങള്‍ കണ്ടതിന് പിന്നാലെയാണ് മേഘ് പൊലീസിനെ വിവരമറിയിച്ചത്. ഇരുവരെയും കൊലപ്പെടുത്തിയതിനുശേഷം യോഗേഷ് മക്കളുമായി നാടുവിടുകയായിരുന്നുവെന്ന് മേഘ് ആരോപിക്കുന്നു.
യോഗേഷ് നിലവില്‍ തൊഴില്‍രഹിതനാണെന്നാണ് ബന്ധുക്കള്‍ പറയുന്നത്. പൊലീസ് അന്വേഷണത്തിനിടെയാണ് യോഗേഷ് അറസ്റ്റിലായത്. കൊല നടന്ന സ്ഥലത്തുനിന്ന് യോഗേഷിന്റെ രക്തക്കറ പുരണ്ട വസ്ത്രങ്ങളും കൊലയ്ക്കുപയോഗിച്ച കത്രികയും കണ്ടെടുത്തു. സംഭവത്തില്‍ അന്വേഷണം പുരോഗമിക്കുകയാണെന്ന് പൊലീസ് .
"
https://www.facebook.com/Malayalivartha
