മലപ്പുറത്ത് തുവ്വൂര്‍ പഞ്ചായത്ത് ഓഫീസ് പെട്രോള്‍ ഒഴിച്ച് തീയിടാന്‍ ശ്രമം. കരുവാരക്കുണ്ട് തരിശ് സ്വദേശി വെമ്മുള്ളി മജീദാണ് ഭീകരാന്തരീക്ഷമുണ്ടാക്കിയത്. കെട്ടിട പെര്‍മിറ്റ് നല്‍കാത്തതില്‍ പ്രതിഷേധിച്ചായിരുന്നു പഞ്ചായത്ത് ഓഫീസില്‍ ഇയാള്‍ അക്രമം നടത്തിയത്. ജീവനക്കാരെയും ആക്രമിക്കാന്‍ ശ്രമിച്ചു. ജീവനക്കാരും സമീപത്തുണ്ടായിരുന്നവരും ബലംപ്രയോഗിച്ചാണ് ഇയാളെ കീഴ്‌പ്പെടുത്തിയത്.

മജീദിന്റെ മാമ്പുഴയിലെ വാണിജ്യ കെട്ടിടത്തിന് അനുമതി നല്‍കാത്തതാണ് പ്രകോപനത്തിന് കാരണം. പ്രവാസിയായിരിക്കെ സമ്പാദിച്ച പണം മുഴുവന്‍ കെട്ടിടത്തിനായി ചെലവഴിച്ചതായി മജീദ് പറയുന്നു. കാഴ്ച പരിമിതിയുള്ള മകന്റെ ചികിത്സയ്ക്കുപോലും പണമില്ലെന്നും ഇയാള്‍ പറഞ്ഞു.

കഴിഞ്ഞവര്‍ഷം ഫെബ്രുവരിയിലാണ് മജീദ് കെട്ടിടത്തിന്റെ പെര്‍മിറ്റിനായി പഞ്ചായത്തില്‍ അപേക്ഷ നല്‍കിയത്. എന്നാല്‍ കെട്ടിട നിര്‍മാണത്തില്‍ പിഴവുകള്‍ ഉണ്ടെന്നാണ് പഞ്ചായത്ത് അധികൃതര്‍ പറയുന്നത്. അപേക്ഷയിലെ അപാകതകള്‍ പരിഹരിക്കണമെന്നാവശ്യപ്പെട്ട് മജീദിന് നോട്ടീസ് നല്‍കിയെന്നും മറുപടി ലഭിച്ചില്ലെന്നും അധികൃതര്‍ വ്യക്തമാക്കുന്നു.