തൃശൂരില്‍ ഓണാഘോഷങ്ങള്‍ ലക്ഷ്യമാക്കി ലഹരിക്കടത്ത് നടത്തുന്ന സംഘത്തിലെ ഒരാള്‍ പിടിയില്‍. തൃശൂര്‍ ഡാന്‍സാഫ് ടീമും തൃശൂര്‍ സിറ്റി പൊലീസും സംയുക്തമായി നടത്തിയ പരിശോധനയിലാണ് ലഹരി കടത്ത് പിടികൂടിയത്.

ചൊവ്വാഴ്ച രാവിലെ കോയമ്പത്തൂരില്‍ നിന്ന് ട്രെയിന്‍ മാര്‍ഗം തൃശൂരിലെത്തിയ എരുമപ്പെട്ടി ദേശമംഗലം സ്വദേശി മുഹമ്മദിനെ ആണ് (28) കസ്റ്റഡിയിലെടുത്തത്. റെയില്‍വേ സ്‌റ്റേഷന് മുന്നില്‍ നിന്നാണ് ഇയാളെ പിടികൂടിയത്.

തുടര്‍ന്ന് നടത്തിയ പരിശോധനയില്‍ ഇയാളില്‍ നിന്ന് ഒരു കോടി രൂപയോളം വിലവരുന്ന ഹാഷിഷ് ഓയില്‍ പിടികൂടുകയായിരുന്നു. ബംഗളൂരുവില്‍ നിന്നാണ് ലഹരി എത്തിയ്ക്കുന്നത്. ഇയാളുടെ മൊബൈല്‍ ഫോണും പരിശോധിച്ചു വരികയാണ്. ലഹരി ഇടപാടുകാരെ കുറിച്ചും അന്വേഷണം നടന്നു വരികയാണ്.