ലഹരിക്കടിമയായ മകന്റെ അടിയേറ്റ് തലയ്ക്കു ഗുരുതരമായ പരിക്കുപറ്റി ചികിത്സയിലായിരുന്ന പിതാവ് മരിച്ചു. ഞാറയ്ക്കൽ പോലീസ് സ്റ്റേഷനു പടിഞ്ഞാറ് വാടക്കൽ വീട്ടിൽ ജോസഫ് (65) ആണ് മരിച്ചത്. വിമുക്തഭടനാണ് അദ്ദേഹം . നിലവിളക്കുകൊണ്ട്‌ തലയ്ക്കടിക്കുകയായിരുന്നു. മകൻ ജൂഡിയുടെ ആക്രമണത്തിൽ ജോസഫിന്റെ ഭാര്യ റാണിക്കും പരിക്കേറ്റിരുന്നു.

സെപ്റ്റംബർ 28-നായിരുന്നു സംഭവം. ചികിത്സയിലായിരുന്ന റാണി വ്യാഴാഴ്ചയാണ് ആസ്പത്രിയിൽനിന്ന് തിരിച്ചെത്തിയത്. ജോസഫ് വ്യാഴാഴ്ച രാവിലെയാണ് മരിച്ചത്. സംഭവം നടന്നയുടൻ പോലീസ് കസ്റ്റഡിയിലെടുത്ത മകൻ ജൂഡി (31) റിമാൻഡിലാണ്. ഇയാൾ ലഹരിക്കടിമയാണെന്ന് പോലീസ് .

ജൂഡിക്കൊപ്പം വീട്ടിൽ താമസിച്ചിരുന്ന പെൺകുട്ടിക്കും അക്രമത്തിൽ പരിക്കേറ്റു. കൈക്ക് സാരമായി പരിക്കേറ്റ അവരെ പോലീസ് സുരക്ഷിത കേന്ദ്രത്തിലേക്ക് മാറ്റി. ജോസഫിന്റെ സംസ്‌കാരം വെള്ളിയാഴ്ച വൈകീട്ട് മൂന്നിന് എളങ്കുന്നപ്പുഴയിലെ തറവാട്ടുവീട്ടിൽ നിന്നാരംഭിച്ച് പെരുമ്പിള്ളി തിരുകുടുംബ ദേവാലയ സെമിത്തേരിയിൽ നടക്കുന്നതാണ്.