പാലിയേക്കരയില്‍ ടോള്‍ വിലക്ക് പുനരാരംഭിക്കേണ്ടതില്ലെന്ന് കോടതി. ഹര്‍ജി ചൊവാഴ്ചത്തേക്ക് ഹൈക്കോടതി പരിഗണിക്കും. കഴിഞ്ഞ തവണ കളക്ടര്‍ നല്‍കിയ റിപ്പോര്‍ട്ടിന്റെ പശ്ചാത്തലത്തിലായിരുന്നു ടോള്‍ പിരിവ് നീട്ടിവച്ചത്. ടോള്‍ പിരിവ് പുനരാരംഭിക്കണമെന്നാണ് ഇന്നും ദേശീയ പാത അതോറിട്ടി ആവശ്യപ്പെട്ടത്. എന്നാല്‍ ഇക്കാര്യം അംഗീകരിക്കാന്‍ കോടതി തയ്യാറായില്ല. കാരണം നേരത്തെ പാലിയേക്കര ടോള്‍ പിരിവ് വര്‍ദ്ധിപ്പിച്ചതുമായി ബന്ധപ്പെട്ട് ചില വിശദീകരണങ്ങള്‍ കോടതി കേന്ദ്രസര്‍ക്കാരിനോടും ദേശീയ പാത അതോറിട്ടിയോടും ചോദിച്ചിരുന്നു.

ടോള്‍ നിരക്ക് കുറയ്ക്കുന്നതുമായി ബന്ധപ്പെട്ട കാര്യങ്ങളാണ് കോടതി ചോദിച്ചത്. റോഡ് അത്ര നല്ല രീതിയിലല്ലാത്തതിനാല്‍ വലിയ രീതിയിലുള്ള ഗതാഗത കുരുക്കും യാത്രാ ദുരിതവുമാണ് നിലനില്‍ക്കുന്നത്. ഈ സാഹചര്യത്തില്‍ ടോള്‍ നിരക്ക് കുറയ്ക്കുന്നതിനെക്കുറിച്ചായിരുന്നു കേന്ദ്ര സര്‍ക്കാരിനോട് കോടതി ആരാഞ്ഞത്. എന്നാല്‍ വിശദീകരണത്തിനുള്ള മറുപടി നല്‍കാന്‍ കേന്ദ്ര സര്‍ക്കാര്‍ കൂടുതല്‍ സമയം ആവശ്യപ്പെട്ടിട്ടുണ്ട്. ഈ സാഹചര്യത്തിലാണ് ടോള്‍ പിരിവ് പുനരാരംഭിക്കുന്നതുമായി ബന്ധപ്പെട്ട ഉത്തരവ് കോടതിയില്‍ നിന്ന് ഉണ്ടാകാത്തത്. അടുത്ത ചൊവാഴ്ച വിഷയം വീണ്ടും കോടതി പരിഗണിക്കും. അതുവരെ ടോള്‍ വിലക്ക് പുനരാരംഭിക്കേണ്ടതില്ലെന്നാണ് കോടതിയുടെ തീരുമാനം.