മദ്യപാനത്തിനിടെ ഉണ്ടായ തര്‍ക്കത്തിനിടെ മലയാളി യുവാവിനെ ചുറ്റികയ്ക്കടിച്ച് കൊലപ്പെടുത്തി. തമിഴ്നാട് കമ്പത്താണ് തൃശൂര്‍ സ്വദേശി മുഹമ്മദ് റാഫി കൊല്ലപ്പെട്ടത്. മദ്യപാനത്തിനിടെ ഉണ്ടായ തര്‍ക്കമാണ് കൊലപാതകത്തിന് കാരണം. പ്രതിയായ ഗൂഡല്ലൂര്‍ സ്വദേശി ഉദയകുമാറിനെ പൊലീസ് അറസ്റ്റ് ചെയ്തിട്ടുണ്ട്.

ഇന്നലെ രാത്രിയാണ് സംഭവം നടന്നത്. കമ്പത്ത് ജോലിക്കെത്തിയതായിരുന്നു മുഹമ്മദ് റാഫി. ശരവണന്‍ എന്ന പരിചയക്കാരന്റെ ഗ്രില്ലുകള്‍ പണിയുന്ന വര്‍ക്ക്‌ഷോപ്പിലാണ് റാഫി ജോലി ചെയ്തിരുന്നത്. കമ്പത്തെ ലോഡ്ജിലാണ് ഇയാള്‍ താമസിച്ചിരുന്നത്. അവിടെ തൊട്ടടുത്ത മുറിയില്‍ താമസിച്ചിരുന്നയാളാണ് ഉദയകുമാര്‍. ഇന്നലെയും പതിവുപോലെ ജോലി കഴിഞ്ഞ് ലോഡ്ജിലെത്തിയ മുഹമ്മദ് റാഫി ഉദയകുമാറിനൊപ്പം മദ്യപിച്ചു.

അതിനിടെ ഇരുവരും തമ്മില്‍ തര്‍ക്കമുണ്ടായി. തുടര്‍ന്നാണ് മേസ്തിരിയായ ഉദയകുമാര്‍ കൈവശമുണ്ടായിരുന്ന ആയുധങ്ങളില്‍ നിന്ന് ചുറ്റികയെടുത്ത് റാഫിയുടെ നെഞ്ചില്‍ അടിച്ചത്. ഇതോടെ റാഫി ബോധംകെട്ടുവീണു. ശബ്ദം കേട്ടെത്തിയ ലോഡ്ജ് ജീവനക്കാര്‍ ഉടന്‍തന്നെ പൊലീസില്‍ വിവരമറിയിച്ചു. ഉദ്യോഗസ്ഥര്‍ എത്തിയപ്പോഴേക്കും മുഹമ്മദ് റാഫി മരിച്ചിരുന്നു. ഇയാളുടെ മൃതദേഹം പോസ്റ്റ്‌മോര്‍ട്ടത്തിന് ശേഷം കമ്പത്തെ സര്‍ക്കാര്‍ ആശുപത്രിയില്‍ സൂക്ഷിച്ചിരിക്കുകയാണ്.