താമരശ്ശേരിയിലെ ഒന്പത് വയസുകാരിയുടെ മരണം ; കാരണം അമീബിക് മസ്തിഷ്ക ജ്വരം ബാധ തന്നെ
കോഴിക്കോട് താമരശ്ശേരിയിലെ ഒന്പത് വയസുകാരിയുടെ മരണം അമീബിക് മസ്തിഷ്കജ്വരം ബാധിച്ചാണെന്ന് ജില്ലാ മെഡിക്കല് ഓഫീസറുടെ റിപ്പോര്ട്ട്. ആരോഗ്യ വകുപ്പ് ഡയറക്ടര്ക്ക് നല്കിയ റിപ്പോര്ട്ടിലാണ് അനയയുടെ മരണകാരണം അമീബിക് മസ്തിഷ്ക ജ്വരം മൂലമാണെന്ന് രേഖപ്പെടുത്തിയത്. പോസ്റ്റ്മോര്ട്ടത്തിനിടെ കുട്ടിയുടെ നട്ടെല്ലില് നിന്ന് ശേഖരിച്ച സ്രവത്തില് അമീബയുടെ സാന്നിധ്യം കണ്ടെത്തിയെന്നാണ് റിപ്പോര്ട്ടിലുള്ളത്.
അനയയുടെ മരണം അമീബിക് മസ്തിഷ്ക ജ്വരം ബാധിച്ചല്ലെന്നായിരുന്നു കുടുംബത്തിന്റെ ആരോപണം. താമരശ്ശേരി താലൂക്ക് ആശുപത്രിയില് നിന്ന് മതിയായ ചികിത്സ കുഞ്ഞിന് നല്കിയില്ലെന്ന് ആരോപിച്ചാണ് സനൂപ് ഡോക്ടര് വിപിനെ വെട്ടിക്കൊലപ്പെടുത്താന് ശ്രമിച്ചത്. ഡോക്ടര്ക്ക് നേരെ ആക്രമണം ഉണ്ടായ താമരശ്ശേരി താലൂക്ക് ആശുപത്രിയില് കെജിഎംഒഎ പ്രഖ്യാപിച്ച അനിശ്ചിതകാല സമരം തുടരുന്നു. അത്യാഹിത വിഭാഗവും ഒപിയും ഉള്പ്പെടെ ആശുപത്രിയിലെ മുഴുവന് സേവനവും സ്തംഭിപ്പിച്ചാണ് ഡോക്ടര്മാരുടെ സമരം.
അതീവ ഗുരുതരാവസ്ഥയില് എത്തുന്ന രോഗികളെ മാത്രമാണ് കാഷ്വാലിറ്റിയില് പരിശോധിക്കുന്നത്. ആശുപത്രി പരിസരം സേഫ് സോണ് ആയി പ്രഖ്യാപിക്കുക കാഷ്വാലിറ്റിയില് കൃത്യമായ ട്രയാജ് സംവിധാനം നടപ്പിലാക്കുക, പൊലീസ് എയ്ഡ്, ഔട്ട് പോസ്റ്റുകള് സ്ഥാപിക്കുക, സിസിടിവി, സെക്യൂരിറ്റി സിസ്റ്റങ്ങള് നടപ്പിലാക്കുക, എന്നീ ആവശ്യങ്ങള് ഉന്നയിച്ചാണ് സമരം. ആക്രമണത്തില് പരിക്കേറ്റ ഡോക്ടര് വിപിന്റെ ആരോഗ്യനില തൃപ്തികരമാണ്. ഡോക്ടര് രണ്ട് ദിവസത്തിനകം ആശുപത്രി വിടും.
https://www.facebook.com/Malayalivartha
