ഷാഫി പറമ്പിലിനെതിരായ മര്‍ദനത്തില്‍ പ്രതികരണവുമായി കോഴിക്കോട് റൂറല്‍ എസ്പി
പേരാമ്പ്രയില്‍ റാലിക്കിടെ ഷാഫി പറമ്പിലില്‍ എംപിക്കെതിരായ പൊലീസ് മര്‍ദനത്തില്‍ പ്രതികരണവുമായി റൂറല്‍ എസ്പി കെ.ഇ ബൈജു. പൊലീസിലെ ചില ആളുകള്‍ മനഃപ്പൂര്‍വം പ്രശ്‌നമുണ്ടാക്കാന്‍ ശ്രമിച്ചുവെന്നും അവരെ കണ്ടെത്താന്‍ ശ്രമം നടക്കുകയാണെന്നും കെ.ഇ ബൈജു പറഞ്ഞു.
ഞങ്ങള്‍ ലാത്തി ചാര്‍ജ് ചെയ്തിട്ടില്ല. ഒരു കമാന്‍ഡ് നല്‍കുകയോ, വിസിലടിച്ച് അടിച്ചോടിക്കുകയോ ചെയ്യുന്ന ആക്ഷന്‍ അവിടെ നടന്നിട്ടില്ല. പക്ഷെ ഞങ്ങളുടെ കൂടെയുള്ള ആളുകള്‍ മനഃപ്പൂര്‍വം കുഴപ്പമുണ്ടാക്കാന്‍ ശ്രമിച്ചിട്ടുണ്ടെന്ന് പിന്നീട് മനസിലാക്കി. അത് ആരാണെന്ന് കണ്ടുപിടിക്കാന്‍ ഞങ്ങള്‍ എഐ ടൂളുകള്‍ ഉപയോഗിച്ച് അന്വേഷണം നടത്തിവരികയാണ്. എംപിയെ പുറകില്‍ നിന്ന് അടിച്ചുവെന്നും കെ.ഇ ബൈജു കൂട്ടിച്ചേര്‍ത്തു.
പേരാമ്പ്ര സികെജി കോളജ് യൂണിയന്‍ തെരഞ്ഞെടുപ്പുമായി ബന്ധപ്പെട്ട തര്‍ക്കത്തിന് പിന്നാലെ യുഡിഎഫും എല്‍ഡിഎഫും ഇന്നലെ വൈകീട്ട് പേരാമ്പ്രയില്‍ റാലി സംഘടിപ്പിച്ചിരുന്നു. റാലികള്‍ നേര്‍ക്കുനേര്‍ വന്നതോടെ സംഘര്‍ഷമായി. ഇതിനിടെ പൊലീസ് ലാത്തി ചാര്‍ജും കണ്ണീര്‍വാതക പ്രയോഗവും നടത്തി. തുടര്‍ന്നായിരുന്നു ലാത്തി കൊണ്ടുള്ള അടിയില്‍ ഷാഫി പറമ്പില്‍ എംപിക്ക് പരിക്കേറ്റത്.
https://www.facebook.com/Malayalivartha
