കമ്മിഷന്‍ വ്യവസ്തയില്‍ ആര്‍ക്കും കെഎസ്ആര്‍ടിസിക്ക് വേണ്ടി പരസ്യങ്ങള്‍ പിടിക്കാന്‍ അവസരം നല്‍കുന്ന പദ്ധതി ഉടന്‍ നിലവില്‍ വരുമെന്ന് മന്ത്രി കെ.ബി. ഗണേഷ് കുമാര്‍. പദ്ധതി പ്രകാരം, ഒരു ലക്ഷം രൂപയുടെ പരസ്യം കെഎസ്ആര്‍ടിസിക്ക് നേടി കൊടുക്കുന്ന ഏതൊരാള്‍ക്കും അതിന്റെ 15 ശതമാനം കമ്മിഷനായി സ്വന്തം അക്കൗണ്ടിലേക്ക് ലഭിക്കും. കെഎസ്ആര്‍ടിസിയില്‍ പരസ്യം പിടിച്ചുകൊണ്ട് ഏതൊരു ചെറുപ്പക്കാരനും മാന്യമായി ജീവിക്കാനുള്ള പുതിയ തൊഴിലവസരമാണ് ഇതിലൂടെ തുറന്നു കൊടുക്കുന്നതെന്നും ഗണേഷ് കുമാര്‍ പറഞ്ഞു.

പരസ്യ കമ്പനികള്‍ കാരണം കോടികളുടെ നഷ്ടമാണ് കെഎസ്ആര്‍ടിസിക്ക് ഉണ്ടാകുന്നതെന്നും ഗണേഷ് കുമാര്‍ പറഞ്ഞു. കഴിഞ്ഞ ആറോ ഏഴോ വര്‍ഷങ്ങള്‍ക്കുള്ളില്‍ 65 കോടി രൂപയെങ്കിലും ഈ വകയില്‍ കോര്‍പ്പറേഷനു നഷ്ടമുണ്ടായിട്ടുണ്ട്. ടെന്‍ഡര്‍ എടുത്തതിനു ശേഷം ചില കമ്പനികള്‍ കള്ളക്കേസുകള്‍ ഉണ്ടാക്കുകയും കോടതിയില്‍ പോയി ആ ഇനത്തില്‍ പണം കൈക്കലാക്കുകയും ചെയ്യുന്നതാണ് കെഎസ്ആര്‍ടിസിക്ക് നഷ്ടമുണ്ടാകാന്‍ കാരണം. ഹൈക്കോടതിയുടെ നിര്‍ദ്ദേശ പ്രകാരം ഇത്തരം കമ്പനികളെ കരിമ്പട്ടികയില്‍പ്പെടുത്തിയിട്ടുണ്ട്. ഇതോടെ ടെന്‍ഡര്‍ വിളിക്കുമ്പോള്‍ സംഘം ചേര്‍ന്ന് വരാതിരിക്കുക എന്ന പുതിയ തന്ത്രമാണ് അവര്‍ പയറ്റുന്നതെന്നും മന്ത്രി പറഞ്ഞു. 'അവനെ വിറ്റ കാശ് നമ്മുടെ പോക്കറ്റിലുണ്ട്' എന്ന് പറഞ്ഞായിരുന്നു മന്ത്രി പുതിയ പദ്ധതി പ്രഖ്യാപിച്ചത്. പരസ്യവരുമാനം കാര്യക്ഷമമാക്കി കോര്‍പ്പറേഷനെ കരകയറ്റാനാണ് പുതിയ പദ്ധതി വഴി ലക്ഷ്യമിടുന്നതെന്നും ഗണേഷ് കുമാര്‍ പറഞ്ഞു.