കണ്ണൂര്‍ പുതിയങ്ങാടിയില്‍ ഗ്യാസ് സിലിണ്ടറിന് തീപിടിച്ചുണ്ടായ അപകടത്തില്‍ ഗുരുതരമായി പൊള്ളലേറ്റ് ചികിത്സയില്‍ കഴിഞ്ഞിരുന്ന എല്ലാവരും മരിച്ചു. ഒക്ടോബര്‍ 9 ന് ഉണ്ടായ അപകടത്തില്‍ പരിക്കേറ്റ് ചികിത്സയിലായിരുന്ന നാല് ഇതരസംസ്ഥാന തൊഴിലാളികളാണ് മരിച്ചത്. ഇവരില്‍ ഒരാള്‍ കഴിഞ്ഞ ദിവസം മരണപ്പെട്ടിരുന്നു ബാക്കി മൂന്നുപേരും ചികിത്സയില്‍ കഴിയുന്നതിനിടെ ഇന്ന് മരിക്കുകയായിരുന്നു.

ഒഡീഷ സ്വദേശി സുഭാഷ് ബെഹറ (53) ആണ് ചികിത്സയിലിരിക്കെ തിങ്കളാഴ്ച മരണപ്പെട്ടത്. ഇയാള്‍ക്കൊപ്പം ഉണ്ടായിരുന്ന ബാക്കി മൂന്നുപേരും പരിയാരം മെഡിക്കല്‍ കോളജ് ആശുപത്രിയില്‍ ചികിത്സയില്‍ തുടരുകയായിരുന്നു ഇതിനിടെയാണ് ഡോക്ടര്‍മാര്‍ മരണം സ്ഥിരീകരിച്ചത്. ഒഡീഷ കുര്‍ദ് സ്വദേശികളായ ശിവ ബെഹറ (35), നിഗം ബെഹറ (40), ജീതു (28) എന്നിവരാണ് മരിച്ചത്.

ഇക്കഴിഞ്ഞ വെള്ളിയാഴ്ച്ചയായിരുന്നു ഇതരസംസ്ഥാന തൊഴിലാളികള്‍ താമസിക്കുന്ന പഴയങ്ങാടിയിലെ ഒറ്റ മുറി വീട്ടിലെ ഗ്യാസ് സിലിണ്ടറിന് പിടിച്ചതും അപകടമുണ്ടായതും. വ്യാഴാഴ്ച രാത്രി ഭക്ഷണം പാകം ചെയ്ത ശേഷം ഗ്യാസ് സിലിണ്ടര്‍ ഓഫാക്കാന്‍ ഇവര്‍ മറന്നിരുന്നു. പിറ്റേന്ന് രാവിലെ എഴുനേറ്റ് ഭക്ഷണമുണ്ടാക്കാനായി തൊഴിലാളികളില്‍ ഒരാള്‍ സ്റ്റൗവിന് തീകൊളുത്താന്‍ ശ്രമിച്ചതോടെയായിരുന്നു തീപിടിത്തമുണ്ടായത്.