സ്ത്രീശാക്തീകരണം, ലിംഗസമത്വം എന്നിവയ്ക്ക് പ്രാധാന്യം നൽകി രാഷ്ട്രപതി ദ്രൗപദി മുർമുവിന്റെ റിപ്പബ്ലിക് ദിന സന്ദേശം. കൂടാതെ രാഷ്ട്രീയ ഏകീകരണം, ഗോത്രവർഗ ക്ഷേമം, കർഷക ശാക്തീകരണം എന്നിവയെ കുറിച്ചും രാജ്യത്തെ അഭിസംബോധന ചെയ്തുകൊണ്ടുള്ള പ്രസംഗത്തിൽ രാഷ്ട്രപതി പ്രത്യേകം എടുത്തുപറ‍ഞ്ഞു. ഇന്ത്യൻ സ്ത്രീകൾ സ്റ്റീരിയോടൈപ്പുകൾ തകർക്കുകയും കൃഷി, ബഹിരാകാശം, കായികം, സൈന്യം തുടങ്ങി രാഷ്ട്രനിർമ്മാണത്തിൽ നിർണായക പങ്ക് വഹിക്കുകയും ചെയ്യുന്നുവെന്ന് രാഷ്ട്രപതി ചൂണ്ടിക്കാണിച്ചു.

ഇന്ത്യൻ വനിതകളുടെ ക്രിക്കറ്റ്, ചെസ്സ് എന്നിവയിലെ വിജയങ്ങളെ കുറിച്ചും രാഷ്ട്രപതി പരാമർശിച്ചു. സ്വയം സഹായ സംഘങ്ങളുമായി ബന്ധപ്പെട്ട് 10 കോടിയിലധികം സ്ത്രീകൾ വികസനം പുനർനിർമ്മിക്കുന്നതായും അവർ കൂട്ടിച്ചേർത്തു. വികസിത ഭാരതത്തിൻ്റെ കാഴ്ചപ്പാടിൽ ലിംഗസമത്വത്തെ കേന്ദ്രീകരിച്ച് സ്ത്രീ-നേതൃത്വത്തിലുള്ള വികസനത്തെ കൂടുതൽ ശക്തിപ്പെടുത്തുമെന്നും അവർ കൂട്ടിച്ചേർത്തു.

പ്രവാസി ഭാരതീയരുടെ സംഭാവനകളെ രാഷ്ട്രപതി പ്രശംസിച്ചു. പ്രവാസി സമൂഹം ഇന്ത്യയുടെ വേരുകളുമായി ആഴത്തിൽ ബന്ധം നിലനിർത്തുന്നതോടൊപ്പം ഇന്ത്യയുടെ ആഗോളനില ശക്തിപ്പെടുത്തുന്നത് തുടരുന്നു. ഓർഗാനിക് കൃഷി പ്രോത്സാഹിപ്പിക്കുക, നവീകരണം, സ്റ്റാർട്ടപ്പുകൾ എന്നിവ പ്രോത്സാഹിപ്പിക്കുക, സുസ്ഥിര വികസനത്തെ പിന്തുണയ്ക്കുക എന്നിവ ഇന്ത്യയുടെ ഭാവി വളർച്ചയുടെ പ്രധാന തൂണുകളാണെന്നും സ്വയംപര്യാപ്തവും മുന്നോട്ട് കുതിക്കുന്നതുമായ ഒരു രാഷ്ട്രം കെട്ടിപ്പടുക്കാൻ കൂട്ടായ പരിശ്രമങ്ങളുടെ ആവശ്യകതയുണ്ടെന്നും രാഷ്ട്രപതി കൂട്ടിച്ചേർത്തു.

രാജ്യസ്നേഹത്തിൻ്റെ ഏകീകരണ ശക്തിയെക്കുറിച്ച് സംസാരിച്ചു. ബങ്കിം ചന്ദ്ര ചാറ്റർജി രചിച്ച വന്ദേമാതരം ഇന്ത്യയുടെ ദേശീയഗാനമായി ദ്രൗപദി മുർമു വിശേഷിപ്പിച്ചു. നീതി, സ്വാതന്ത്ര്യം, സമത്വം, സാഹോദര്യം എന്നിവയുടെ ആദർശങ്ങളെ ലോകത്തിലെ ഏറ്റവും വലിയ റിപ്പബ്ലിക്കായ ഇന്ത്യയുടെ ഭരണഘടന ഉൾക്കൊള്ളുന്നുവെന്നും അതിലെ വ്യവസ്ഥകളിലൂടെ ദേശീയതയ്ക്കും ദേശീയ ഐക്യത്തിനും ശക്തമായ അടിത്തറ നൽകുന്നുവെന്നും രാഷ്ട്രപതി പറഞ്ഞു.

സർക്കാരിൻ്റെ ഗോത്രവർഗ്ഗ ക്ഷേമം, കർഷക ശാക്തീകരണം എന്നിവയിലുള്ള ശ്രദ്ധയെക്കുറിച്ചും രാഷ്ട്രപതി സംസാരിച്ചു. നാഷണൽ സിക്കിൾ സെൽ അനീമിയ എലിമിനേഷൻ മിഷനു കീഴിൽ ആറ് കോടിയിലധികം പരിശോധനകൾ നടത്തിയതായും ഏകദേശം 1.4 ലക്ഷം വിദ്യാർത്ഥികൾ ഏകലവ്യ മോഡൽ റെസിഡൻഷ്യൽ സ്കൂളുകളിൽ പഠിക്കുന്നുണ്ടെന്നും പലരും മത്സരപ്പരീക്ഷകളിൽ മികവ് പുലർത്തുന്നുണ്ടെന്നും അവർ സൂചിപ്പിച്ചു. കർഷകർ സാമ്പത്തിക മേഖലയുടെ നട്ടെല്ലാണെന്നും ഭക്ഷ്യസുരക്ഷയും കയറ്റുമതിയും വർധിപ്പിക്കുന്നുണ്ടെന്നും രാഷ്ട്രപതി പറഞ്ഞു.

സാങ്കേതികവിദ്യ അടിസ്ഥാനമാക്കിയുള്ള ഭരണം ഗുണഭോക്താക്കളെ നേരിട്ട് സേവനങ്ങളുമായി ബന്ധിപ്പിക്കുകയും ജീവിതസൗകര്യം മെച്ചപ്പെടുത്തുകയും ചെയ്യുന്നു. പൊതുപങ്കാളിത്തം കഴിഞ്ഞ ദശകത്തിൽ പ്രധാന ദേശീയ പ്രചാരണങ്ങളെ ജനകീയ പ്രസ്ഥാനങ്ങളാക്കി മാറ്റി. വികസിത ഭാരതം കെട്ടിപ്പടുക്കുന്നത് ഒരു പങ്കാളിത്ത ഉത്തരവാദിത്വമാണെന്ന് പറഞ്ഞ രാഷ്ട്രപതി, ലോകത്തിലെ ഡിജിറ്റൽ ഇടപാടുകളിൽ പകുതിയോളം വരുന്ന ഇന്ത്യയുടെ വലിയ തോതിലുള്ള ഡിജിറ്റൽ പേയ്‌മെൻ്റ് സ്വീകാര്യതയെ സാമൂഹിക പിന്തുണക്ക് എങ്ങനെ പരിവർത്തനപരമായ മാറ്റം കൊണ്ടുവരാൻ കഴിയുമെന്നതിൻ്റെ ഉദാഹരണമായി ചൂണ്ടിക്കാണിക്കുകയും പൗരന്മാരോട് മറ്റ് ദേശീയ ലക്ഷ്യങ്ങൾ കൈവരിക്കുന്നതിലും സമാനമായി പങ്കാളികളാകാൻ അഭ്യർഥിക്കുകയും ചെയ്തു.