ചൂരക്കറി വിവാദത്തിനുശേഷം ഇടതുസര്ക്കാരിനെ വീണ്ടും വെട്ടിലാക്കി സി.ദിവാകരന്
ഇഷ്ടപ്പെട്ട മീന്കറി കിട്ടാത്തതുകൊണ്ട് സിപിഎം സംസ്ഥാന സെക്രട്ടറി ആയിരിക്കെ പിണറായി വിജയന് മുതിര്ന്ന നേതാവ് ആനത്തലവട്ടം ആനന്ദന്റെ വീട്ടില്നിന്ന് ഊണു കഴിക്കാതെ ഇറങ്ങിപ്പോയെന്ന വിവാദ പ്രസ്താവനയ്ക്കു ശേഷം ഇടതുസര്ക്കാരിനെ വെട്ടിലാക്കി വീണ്ടും സിപിഐ നേതാവ് സി. ദിവാകരന്. കേരളത്തില് ഫാക്ടറികളോ നിര്മാണകേന്ദ്രങ്ങളോ സ്ഥാപിക്കാന് സര്ക്കാര് തയാറാകാത്തതുകൊണ്ടാണ് യുവാക്കള് ജോലി തേടി മറ്റു രാജ്യങ്ങളിലേക്കു പോകുന്നതെന്ന കടുത്ത വിമര്ശനമാണ് സി. ദിവകരന് ഉയര്ത്തിയിരിക്കുന്നത്.
''ഇന്ത്യയെയാകെ താരതമ്യപ്പെടുത്തുമ്പോള് ഒരു ചെറിയ പഞ്ചായത്താണീ കേരളം. ഇവിടെ ഒരു ചുക്കും ചുണ്ണാമ്പും ഇല്ല. ഒരു ഹെവി ഇന്ഡസ്ട്രി ഒന്നും ഇവിടെ ഇല്ല. ഇവിടെ പ്രൊഡക്ഷനും മാനുഫാക്ചറിങ്ങും ഇല്ല. കേരളത്തില് കാറോ മോട്ടര് ബൈക്കോ ഹെവി മെഷിനറിയോ ഉല്പാദിപ്പിക്കുന്നുണ്ടോ. ഇത്ര നാള് ആയിട്ടും കേരളത്തില് ഒരു ഫാക്ടറി പോലും ഇല്ല. അതുകൊണ്ടാണ് ചെറുപ്പക്കാര് എങ്ങനെയെങ്കിലും പാസ്പോര്ട് തരപ്പെടുത്തി കാശും കൊടുത്ത് നാടുവിട്ടു പോയി രക്ഷപ്പെടുന്നത്. കേരളത്തില് ഫാക്ടറിയും നിര്മാണവും വരുത്തേണ്ടത് സര്ക്കാരല്ലേ'' സി. ദിവാകരന് ചോദിക്കുന്നു.
കോളജ് പഠനകാലത്ത് അമ്മ ഉണ്ടാക്കി കൊടുത്തുവിട്ട ചെറിയ ഒറോട്ടി കഴിച്ചാണ് വിശപ്പടക്കിയിരുന്നതെന്ന് മുഖ്യമന്ത്രി പിണറായി വിജയന് പൊതുപരിപാടിയില് പറഞ്ഞത് സമൂഹമാധ്യമങ്ങളില് വൈറലായതിനു പിന്നാലെയാണ് സി.ദിവാകരന്റെ മീന്കഥ വെളിപ്പെടുത്തലും ചര്ച്ചയായത്. പിണറായി വിജയന് ചൂരക്കറി കഴിക്കാന് കൂട്ടാക്കാതെ ഇരുന്നതിനാല് അന്നത്തെ സിപിഎം ജില്ലാ സെക്രട്ടറി എം.സത്യനേശന് പിറ്റേന്നു പുലര്ച്ചെ പാളയം മാര്ക്കറ്റില് പോയി വലിയ നെയ്മീന് വാങ്ങി പാറശാലയില് എത്തിച്ചു കറിവച്ചു കൊടുത്തുവെന്നും അതോടെ പിണറായിക്കു സന്തോഷമായെന്നുമാണ് സി.ദിവാകരന് പറഞ്ഞത്.
https://www.facebook.com/Malayalivartha
