മണ്ഡലകാലം കഴിയുമ്പോള്‍ മാത്രം ശമ്പളം അക്കൗണ്ടിലേക്ക് നല്‍കുന്ന രീതി നിലവിലിരിക്കെ ശബരിമല സന്നിധാനത്ത് ജോലി ചെയ്തിരുന്ന താല്‍ക്കാലിക ജീവനക്കാരുടെ സംശയകരമായ പണമിടപാടുകളില്‍ ക്രിമിനല്‍ അന്വേഷണം നടത്താന്‍ ഹൈക്കോടതി ഉത്തരവിട്ടു. 2025-26 മണ്ഡലമകരവിളക്ക് കാലയളവില്‍ നടന്ന സാമ്പത്തിക ഇടപാടുകളെക്കുറിച്ച് ശബരിമല സ്‌പെഷ്യല്‍ കമ്മീഷണര്‍ സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തിലാണ് ജസ്റ്റിസ് രാജ വിജയരാഘവന്‍, ജസ്റ്റിസ് കെ.വി. ജയകുമാര്‍ എന്നിവരടങ്ങിയ ഡിവിഷന്‍ ബെഞ്ചിന്റെ നടപടി. മൂന്നാഴ്ചയ്ക്കകം അന്വേഷണ റിപ്പോര്‍ട്ട് സമര്‍പ്പിക്കാന്‍ കോടതി നിര്‍ദ്ദേശിച്ചു.

സീസണ്‍ കാലയളവില്‍ സന്നിധാനത്തെ പോസ്റ്റ് ഓഫീസ് വഴി മാത്രം 14,08,880 രൂപയുടെ മണിയോഡറുകള്‍ അയക്കപ്പെട്ടതായാണ് സ്‌പെഷ്യല്‍ കമ്മീഷണറുടെ റിപ്പോര്‍ട്ടില്‍ പറയുന്നത്. പ്രതിദിനം വെറും 650 രൂപ വേതനത്തിന് ജോലി ചെയ്യുന്ന താല്‍ക്കാലിക ജീവനക്കാരാണ് ഇത്തരത്തില്‍ ലക്ഷങ്ങള്‍ നാട്ടിലേക്ക് അയച്ചത്. ഇതില്‍ രണ്ട് ജീവനക്കാര്‍ ഒരു ലക്ഷത്തിന് മുകളിലും, മറ്റ് മൂന്ന് പേര്‍ 25,000 രൂപയ്ക്ക് മുകളിലും അയച്ചതായി കണ്ടെത്തിയിട്ടുണ്ട്.

കുറഞ്ഞ കാലയളവിനുള്ളില്‍ ഇത്രയും വലിയ തുക കൈമാറ്റം ചെയ്യപ്പെട്ടത് പണത്തിന്റെ ഉറവിടത്തെക്കുറിച്ച് വലിയ സംശയങ്ങള്‍ക്ക് ഇടയാക്കിയത്.ദേവസ്വം വിജിലന്‍സ് എസ്പിയാണ് ഈ ക്രമക്കേട് ആദ്യം കണ്ടെത്തിയത്. പോസ്റ്റ് ഓഫീസില്‍ പണം അയക്കാന്‍ നല്‍കിയ നോട്ടുകളില്‍ ഭസ്മത്തിന്റെയും കുങ്കുമത്തിന്റെയും അംശങ്ങള്‍ കണ്ടെത്തിയത് സംശയം വര്‍ദ്ധിപ്പിച്ചു. തുടര്‍ന്ന് സംശയനിഴലിലുള്ള ജീവനക്കാരെ ചോദ്യം ചെയ്യാന്‍ വിളിപ്പിച്ചെങ്കിലും അവര്‍ ഹാജരാകാന്‍ തയ്യാറായില്ല.

മണ്ഡലകാലം കഴിയുമ്പോള്‍ മാത്രം ശമ്പളം അക്കൗണ്ടിലേക്ക് നല്‍കുന്ന രീതി നിലവിലിരിക്കെ, തീര്‍ത്ഥാടന കാലത്ത് തന്നെ ഇത്രയും തുക കൈമാറിയത് വഴിപാടായി ലഭിക്കുന്ന പണം അനധികൃതമായി കൈക്കലാക്കിയതാണെന്നാണ് വിജിലന്‍സിന്റെ പ്രാഥമിക നിഗമനം.വിഷയത്തിന്റെ ഗൗരവം പരിഗണിച്ച് സന്നിധാനം പോലീസ് സ്‌റ്റേഷനില്‍ ഔദ്യോഗികമായി പരാതി നല്‍കാന്‍ ദേവസ്വം കമ്മീഷണര്‍ എക്‌സിക്യൂട്ടീവ് ഓഫീസര്‍ക്ക് നിര്‍ദ്ദേശം നല്‍കി. ഇതിലൂടെ വിശദമായ ക്രിമിനല്‍ അന്വേഷണം ഉറപ്പാക്കാനാണ് ലക്ഷ്യമിടുന്നത്. ശബരിമലയിലെ കാണിക്ക പരിപാലനം ഉള്‍പ്പെടെയുള്ള സുപ്രധാന മേഖലകളില്‍ ജോലി ചെയ്തിരുന്ന നൂറിലധികം ജീവനക്കാര്‍ നിലവില്‍ അന്വേഷണ പരിധിയിലുണ്ട്.