തിരുവനന്തപുരം മെഡിക്കല് കോളേജില് ഡോക്ടര് ചമഞ്ഞെത്തിയ യുവതിയെ പിടികൂടി സുരക്ഷാജീവനക്കാര്
മെഡിക്കല് കോളേജില് ഡോക്ടര് ചമഞ്ഞെത്തിയ യുവതി പിടിയില്. ആശുപത്രിയിലെ സുരക്ഷാ ജീവനക്കാരാണ് യുവതിയെ പിടികൂടിയത്. തിരുവനന്തപുരം മെഡിക്കല് കോളേജിലെ ന്യൂറോ സര്ജനെന്ന വ്യാജേനയാണ് സൂപ്പര് സ്പെഷ്യാലിറ്റി ബ്ലോക്കില് യുവതി കയറിക്കൂടിയത്. ഇവര് പെരുന്ന സ്വദേശിയാണെന്നാണ് പ്രാഥമികവിവരം. പേരൂര്ക്കടയിലാണ് താമസിക്കുന്നതെന്നും ഇവര് മൊഴി നല്കിയിട്ടുണ്ട്.
ഇന്ന് രാവിലെയാണ് സ്തെതസ്കോപ്പ് ഉള്പ്പടെ ധരിച്ച് യുവതി ആശുപത്രിയിലെത്തിയത്. സീനിയര് ന്യൂറോ സര്ജനാണെന്ന് പറഞ്ഞാണ് സൂപ്പര് സ്പെഷ്യാലിറ്റി ബ്ലോക്കില് കയറിക്കൂടിയത്. ഇവരുടെ പെരുമാറ്റത്തില് സംശയം തോന്നിയ സുരക്ഷാ ജീവനക്കാര് അധികൃതരെ വിവരം അറിയിച്ചു. യുവതി പറഞ്ഞപേരിലുള്ള ഡോക്ടര്മാരാരും ആശുപത്രിയില് ജോലി ചെയ്യുന്നില്ലെന്ന് അധികൃതര് അറിയിച്ചു.
സിസിടിവി ദൃശ്യങ്ങള് പരിശോധിച്ചപ്പോള് കാന്റീന് ഉള്പ്പടെയുള്ള സ്ഥലങ്ങളില് ഇവര് കറങ്ങിതിരിഞ്ഞിരുന്നതായി വ്യക്തമായി. എന്നാല് ഇവരെ കണ്ടെത്താന് കഴിഞ്ഞിരുന്നില്ല. പിന്നീട് വേഷം മാറി മള്ട്ടി സ്പെഷ്യാലിറ്റി ബ്ലോക്കിന് മുന്നില് നിന്നും ഓട്ടോറിക്ഷയില് കടന്നുകളയാന് ശ്രമിക്കുമ്പോഴാണ് വനിതാ സെക്യൂരിറ്റി ജീവനക്കാര് പിടികൂടിയത്.
സംഭവത്തില് മെഡിക്കല് കോളേജ് പൊലീസ് കേസെടുത്തു. യുവതിയുടെ യഥാര്ത്ഥ പേര് വ്യക്തമല്ല. ഇവര് പല പേരുകള് മാറ്റി പറയുന്നുണ്ട്. ഭര്ത്താവ് ശ്രീചിത്രയില് ജോലിചെയ്യുന്നുവെന്ന് പറഞ്ഞെങ്കിലും അങ്ങനൊരാളെ കണ്ടെത്താനായിട്ടില്ല. വേഷം മാറി ആശുപത്രിയിലെത്തിയതിനു പിന്നിലെ ഉദ്ദേശ്യം ഇപ്പോഴും വ്യക്തമല്ല. ചോദ്യം ചെയ്യല് പുരോഗമിക്കുകയാണെന്ന് പൊലീസ് അറിയിച്ചു.
https://www.facebook.com/Malayalivartha
