തലസ്ഥാന നഗരിയുടെ ഹൃദയഭാഗമായ ബേക്കറി ജങ്ഷനില്‍, മുപ്പത് സെന്റ് ഭൂമിയില്‍ തലയുയര്‍ത്തി നില്‍ക്കുന്ന ആ അത്യാഡംബര മന്ദിരത്തിന് പറയാന്‍ കഥകള്‍ ഒരുപാടുണ്ട്. ഇന്ന് കേരള രാഷ്ട്രീയത്തെ പിടിച്ചുലയ്ക്കുന്ന ഒരു വന്‍ കൊടുങ്കാറ്റിന്റെ കേന്ദ്രബിന്ദുവാണ് ഈ വസതി. എന്നാല്‍, വര്‍ഷങ്ങള്‍ക്ക് മുന്‍പ് തിരുവനന്തപുരംകാര്‍ക്ക് ഇതൊരു വീടായിരുന്നില്ല; ആയിരക്കണക്കിന് കുരുന്നുകള്‍ക്ക് ജന്മം നല്‍കിയ, തലസ്ഥാനത്തെ അതിപ്രശസ്തമായ ഒരു പ്രസവാശുപത്രിയായിരുന്നു അത്. ബുധനാഴ്ച പുലര്‍ച്ചെ കേന്ദ്ര അന്വേഷണ ഏജന്‍സിയായ ഇ.ഡി ഇരച്ചുകയറിയതോടെ, ഏതാണ്ട് എട്ടര മണിക്കൂറോളമാണ് ഈ വസതി അതീവ ഉദ്വേഗത്തിന്റെ നിഴലില്‍ പൂര്‍ണ്ണമായും അടഞ്ഞുകിടന്നത്.

തിരുവനന്തപുരത്തെ പഴയ തലമുറയ്ക്ക് 'വത്സലാ നഴ്സിംഗ് ഹോം' എന്ന പേര് സുപരിചിതമാണ്. പ്രശസ്ത ഗൈനക്കോളജിസ്റ്റായിരുന്ന ഡോക്ടര്‍ കുഞ്ഞമ്മ മത്തായിയുടെ സ്വപ്ന സാക്ഷാത്കാരമായിരുന്നു ഈ സ്ഥാപനം. അവരുടെ കാലശേഷം മകനായ ഡോക്ടര്‍ റോയിയാണ് ഈ ആശുപത്രി നടത്തിയിരുന്നത്. പണക്കാര്‍ക്കും വി.ഐ.പികള്‍ക്കും വേണ്ടി അന്നത്തെ കാലത്ത് അത്രമേല്‍ ആഡംബരത്തോടെ, ഒരു ഫൈവ് സ്റ്റാര്‍ ഹോട്ടലിന് സമാനമായ സൌകര്യങ്ങളോടെയാണ് ഈ പ്രസവാശുപത്രി സജ്ജീകരിച്ചിരുന്നത്. അപ്പോഴും സാധാരണക്കാര്‍ക്കും ഇവിടെ മതിയായ ചികില്‍സ ലഭ്യമായിരുന്നു.

കാലാന്തരത്തില്‍ ഡോക്ടര്‍ റോയിയില്‍ നിന്നും ഈ കെട്ടിടം പ്രമുഖ ആരോഗ്യ ശൃംഖലയായ 'നിംസ് മൈക്രോ ഹോസ്പിറ്റല്‍ ഗ്രൂപ്പ്' വിലയ്ക്ക് വാങ്ങി. തുടര്‍ന്നാണ് പഴയ ആശുപത്രി കെട്ടിടം അത്യാധുനിക സൌകര്യങ്ങളുള്ള ഒരു ആഡംബര വസതിയായി പുനര്‍നിര്‍മ്മിക്കപ്പെടുന്നത്. മുപ്പത് സെന്റില്‍ പടര്‍ന്നുകിടക്കുന്ന, 4,500 ചതുരശ്ര അടി വിസ്തീര്‍ണ്ണമുള്ള ഒരു കൊട്ടാര സദൃശ്യമായ വസതിയാണിത്. സെന്‍ട്രല്‍ എയര്‍കണ്ടീഷണര്‍ സംവിധാനമുള്ള അഞ്ച് കിടപ്പുമുറികള്‍, മനോഹരമായ നീന്തല്‍ക്കുളം, വൈകുന്നേരങ്ങളില്‍ നടക്കാനായി പ്രത്യേകം തയ്യാറാക്കിയ വാക്കിംഗ് വേ എന്നിവയെല്ലാം ഈ വസതിയുടെ ആഡംബരത്തിന്റെ തെളിവുകളാണ്. ഈ നിംസ് ഗ്രൂപ്പില്‍ നിന്നാണ് മുന്‍ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയന്‍ ഈ കെട്ടിടം വാടകയ്ക്കെടുക്കുന്നത്.

പണ്ട് മനോഹരമായ കുഞ്ഞിക്കരച്ചിലുകള്‍ ഉയര്‍ന്നുകേട്ടിരുന്ന ആ പഴയ വത്സലാ നഴ്സിംഗ് ഹോമിന്റെ ചുവരുകള്‍ക്കുള്ളിലാണ് ബുധനാഴ്ച എക്‌സാലോജിക് സാമ്പത്തിക ഇടപാടുകളെക്കുറിച്ചുള്ള ഇ.ഡിയുടെ കടുത്ത ചോദ്യശരങ്ങള്‍ ഉയര്‍ന്നത്.