വേനലവധി കഴിഞ്ഞ് പുതിയ അധ്യയന വര്‍ഷത്തെ വരവേല്‍ക്കാന്‍ നാളെ വിദ്യാലയങ്ങള്‍ തുറക്കാനിരിക്കെ, എട്ടാം ക്ലാസ് വിദ്യാര്‍ത്ഥിനി നിയ ലെനിന്റെ വിയോഗം അരൂര്‍ ഗ്രാമത്തെ ഒന്നടങ്കം കണ്ണീരിലാഴ്ത്തുകയാണ്. നൃത്ത പരിശീലനത്തിന് പോകുന്നതിനിടെ പാമ്പുകടിയേറ്റ് 24 ദിവസമായി എറണാകുളത്തെ സ്വകാര്യ ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലായിരുന്ന നിയ, ഞായറാഴ്ച രാവിലെ 7.30 ഓടെയാണ് മരണത്തിന് കീഴടങ്ങിയത്. അരൂര്‍ സെന്റ് അഗസ്റ്റിന്‍ സ്‌കൂളിലെ എട്ടാം ക്ലാസ് വിദ്യാര്‍ത്ഥിനിയായ നിയയുടെ അപ്രതീക്ഷിത വിയോഗം നാടിനെയാകെ വിങ്ങലാക്കുകയാണ്.

മെയ് ആറാം തീയതി വൈകിട്ട് ആറ് മണിയോടെയാണ് ദാരുണമായ സംഭവം നടക്കുന്നത്. പ്രദേശത്തെ റെസിഡന്‍സ് അസോസിയേഷന്‍ പരിപാടിയുടെ ഭാഗമായുള്ള നൃത്ത പരിശീലനത്തില്‍ പങ്കെടുക്കാന്‍ പോവുകയായിരുന്നു നിയ. പോകുന്ന വഴിയില്‍ കരിയിലകള്‍ക്കിടയില്‍ വെച്ചാണ് കുട്ടിയുടെ കാലില്‍ പാമ്പ് കടിച്ചത്. എന്നാല്‍ കാലില്‍ എന്തോ കടിച്ചത് പോലെ തോന്നിയപ്പോള്‍, അത് വലിയ കട്ടുറുമ്പ് ആയിരിക്കുമെന്നാണ് നിയ ആദ്യം കരുതിയത്. കൂടെയുണ്ടായിരുന്നവരോടും വീട്ടുകാരോടും കുട്ടി ഇതേ കാര്യമാണ് പറഞ്ഞത്.

പാമ്പുകടിയേറ്റ വിവരം കുട്ടിക്ക് തിരിച്ചറിയാന്‍ കഴിയാതിരുന്നതാണ് അപകടത്തിന്റെ വ്യാപ്തി വര്‍ദ്ധിപ്പിച്ചത്. കടിയേറ്റ് ഒരു മണിക്കൂറിനകം തന്നെ കുട്ടിയുടെ ശാരീരിക അസ്വസ്ഥതകള്‍ കഠിനമാകുകയും കുഴഞ്ഞുവീണ് ബോധം നഷ്ടപ്പെടുകയും ചെയ്തു. ഇതോടെയാണ് പാമ്പ് കടിച്ചതാകാമെന്ന നിഗമനത്തില്‍ വീട്ടുകാര്‍ നിയയെ ഉടന്‍ തന്നെ വീടിനടുത്തുള്ള ആശുപത്രിയില്‍ എത്തിച്ചത്. അവിടെ രണ്ടുദിവസത്തോളം ചികിത്സയില്‍ തുടര്‍ന്ന ശേഷമാണ് വിദഗ്ധ ചികിത്സയ്ക്കായി എറണാകുളം ലേക്ക്‌ഷോര്‍ ആശുപത്രിയിലേക്ക് മാറ്റിയത്.