നടൻ അജിത്തിന്റെ അമ്മ മോഹിനി മണിയുടെ മരണത്തെ തുടർന്ന് അനുശോചനം അറിയിക്കാൻ തമിഴ്നാട് മുഖ്യമന്ത്രിയും നടനുമായ വിജയ് ശനിയാഴ്ച ചെന്നൈയിലെ നടൻ അജിത് കുമാറിന്റെ വസതിയിലെത്തി. സിനിമയിലെ ആത്മാർത്ഥ സൗഹൃദത്തിന്റെ ആഴം വ്യക്തമാക്കുന്ന വികാരനിർഭരമായ നിമിഷങ്ങൾക്കാണ് ചെന്നൈ സാക്ഷ്യം വഹിച്ചത്. തന്റെ ഔദ്യോഗിക തിരക്കുകളെല്ലാം മാറ്റിവെച്ച് കൂട്ടുകാരനെ ആശ്വസിപ്പിക്കാൻ മുഖ്യമന്ത്രി ജോസഫ് വിജയ് ഓടിയെത്തുകയായിരുന്നു.

അമ്മയെന്ന സ്നേഹത്തണലിന്റെ പെട്ടെന്നുള്ള വേർപാടിൽ വിങ്ങിപ്പൊട്ടി നിന്ന അജിത്തിനെ മുഖ്യമന്ത്രി വിജയ് ചേർത്തുപിടിച്ച് ആലിംഗനം ചെയ്തപ്പോൾ കണ്ടുനിന്നവരുടെ കണ്ണുകളും ഈറനണിഞ്ഞു.മുഖ്യമന്ത്രിയായി സ്ഥാനമേറ്റതിന് ശേഷം കറുപ്പ് സ്യൂട്ട് ധരിച്ചാണ് വിജയ് പൊതുവിടത്തിൽ പ്രത്യക്ഷപ്പെടാറുള്ളത്. എന്നാൽ, വെള്ള ഷർട്ടും തവിട്ടുനിറത്തിലുള്ള പാന്റ്‌സും ധരിച്ചാണ് സുഹൃത്തുകൂടിയായ അജിത്തിനെ സമാശ്വസിപ്പിക്കാൻ അദ്ദേഹമെത്തിയത്.

കറുപ്പണിഞ്ഞാണ് തൃഷ മരണവീട്ടിലെത്തിയത്. കൈയിൽ മാലയുമായി കാറിൽനിന്ന് നഗ്നപാദനായാണ് വിജയ് ഇറങ്ങി വന്നത്.വിജയ് തമിഴ്‌നാടിന്റെ മുഖ്യമന്ത്രിയായ ശേഷം ഇതാദ്യമായാണ് ഈ രണ്ട് ജനപ്രിയ നായകന്മാരും തമ്മിൽ നേരിൽ കാണുന്നത്. രാഷ്ട്രീയത്തിന്റെയോ സിനിമയിലെ മത്സരങ്ങളുടെയോ യാതൊരു അതിർവരമ്പുകളുമില്ലാതെ,

കരിയറിന്റെ തുടക്കകാലം മുതൽ കാത്തുസൂക്ഷിക്കുന്ന ആ പഴയ കൂട്ടുകാരന്റെ സങ്കടത്തിൽ പങ്കുചേരാൻ മാത്രമാണ് വിജയ് അവിടെയെത്തിയത്. ആ ആലിംഗനത്തിൽ ഒരേ കാലഘട്ടത്തിൽ തമിഴ് സിനിമയെ തോളിലേറ്റിയ രണ്ട് സുഹൃത്തുക്കളുടെ ഒരുപാട് നല്ല ഓർമ്മകൾ തെളിഞ്ഞുനിന്നു