യുഎഇയിലെ ഫുജൈറയിൽ 14 പേരുടെ ജീവനെടുക്കുകയും 30 പേർക്ക് പരുക്കേൽക്കുകയും ചെയ്ത വൻ വാഹനദുരന്തത്തിൽ നിർണായക നടപടികളുമായി അധികൃതർ. അപകടത്തിൽ ഉൾപ്പെട്ട ട്രക്ക് ഓടിച്ചിരുന്ന ഡ്രൈവറെ ചോദ്യം ചെയ്തതിന് പിന്നാലെ പ്രീ ട്രയൽ കസ്റ്റഡിയിൽ വിട്ടിരിക്കുകയാണ് യുഎഇ പബ്ലിക് പ്രോസിക്യൂഷൻ. ആശുപത്രിയിൽ ചികിത്സയിൽ കഴിയുന്ന ഡ്രൈവർക്കെതിരെ തുടർനടപടികളും സ്വീകരിച്ചു. ഇയാളുടെ പാസ്‌പോർട്ടും ഡ്രൈവിങ് ലൈസൻസും പിടിച്ചെടുക്കാനും അധികൃതർ ഉത്തരവിട്ടിട്ടുണ്ട്. അപകടത്തിന്റെ യഥാർഥ കാരണം കണ്ടെത്താൻ ട്രക്കിന്റെയും അപകടത്തിൽപ്പെട്ട മറ്റു വാഹനങ്ങളുടെയും സാങ്കേതിക പരിശോധന ആരംഭിച്ചു. 14 പേരുടെ മരണത്തിനിടയാക്കിയ ദുരന്തത്തിൽ ആരുടെയെങ്കിലും ഭാഗത്തുനിന്ന് സുരക്ഷാവീഴ്ചയുണ്ടായിട്ടുണ്ടോ എന്നതടക്കം പരിശോധിക്കുകയാണ് അന്വേഷണസംഘം.

നവംബർ 12 വ്യാഴാഴ്ച പുലർച്ചെയാണ് ഫുജൈറയിലെ ഷെയ്ഖ് ഖലീഫ റോഡിൽ നാടിനെ നടുക്കിയ അപകടങ്ങളുണ്ടായത്. രണ്ട് അപകടങ്ങളാണ് തുടർച്ചയായി സംഭവിച്ചതെന്നാണ് പ്രാഥമിക അന്വേഷണത്തിൽ കണ്ടെത്തിയിരിക്കുന്നത്. ആദ്യ അപകടത്തിൽ ഒരു വാഹനം റോഡരികിൽ നിർത്തിയിട്ടിരുന്ന ട്രക്കിൽ ഇടിക്കുകയായിരുന്നു. തൊട്ടുപിന്നാലെയുണ്ടായ രണ്ടാമത്തെ അപകടമാണ് വൻ ദുരന്തത്തിലേക്ക് നയിച്ചത്. രണ്ട് ഷിപ്പിങ് കണ്ടെയ്‌നറുകൾ കയറ്റിയ ട്രക്ക് നിയന്ത്രണം വിട്ട് മുന്നിലുണ്ടായിരുന്ന നിരവധി വാഹനങ്ങളിലേക്ക് ഇടിച്ചുകയറുകയും പിന്നീട് മറിഞ്ഞുവീഴുകയുമായിരുന്നു.

റോഡിൽ വലതുവശത്തെ പാത അറ്റകുറ്റപ്പണികൾക്കായി അടച്ചിട്ടിരുന്ന ഭാഗത്താണ് അപകടങ്ങൾ സംഭവിച്ചത്. ഇതും അന്വേഷണത്തിന്റെ പ്രധാന ഭാഗമാണ്. റോഡിലെ ഗതാഗത നിയന്ത്രണങ്ങൾ കൃത്യമായിരുന്നോ? ആവശ്യമായ സുരക്ഷാ മുന്നറിയിപ്പുകൾ നൽകിയിരുന്നോ? ട്രക്കിന്റെ വേഗത എത്രയായിരുന്നു? വാഹനത്തിന് സാങ്കേതിക തകരാറുണ്ടായിരുന്നോ? തുടങ്ങിയ കാര്യങ്ങൾ വിശദമായി പരിശോധിക്കുകയാണ് അധികൃതർ.

അപകടത്തിൽപ്പെട്ട ട്രക്കും മറ്റു വാഹനങ്ങളും വിശദമായ പരിശോധനയ്ക്കായി കസ്റ്റഡിയിലെടുത്തിട്ടുണ്ട്. പ്രത്യേകിച്ച് ട്രക്കിന്റെ ബ്രേക്കിങ് സംവിധാനമാണ് പരിശോധിക്കുന്നത്. വാഹനങ്ങളിലെ ട്രാക്കിങ് ഉപകരണങ്ങളിൽനിന്നും വേഗത രേഖപ്പെടുത്തുന്ന സംവിധാനങ്ങളിൽനിന്നുമുള്ള വിവരങ്ങളും ശേഖരിക്കാൻ നിർദേശം നൽകിയിട്ടുണ്ട്. ഇതിലൂടെ അപകടത്തിന് തൊട്ടുമുമ്പ് ട്രക്കിന്റെ വേഗത എത്രയായിരുന്നു, ഡ്രൈവർക്ക് വാഹനം നിയന്ത്രിക്കാൻ സാധിക്കാതിരുന്നതിന് പിന്നിൽ സാങ്കേതിക കാരണങ്ങളുണ്ടായിരുന്നോ തുടങ്ങിയ കാര്യങ്ങൾ വ്യക്തമാക്കാനാകുമെന്നാണ് പ്രതീക്ഷ.

അപകടത്തിൽപ്പെട്ട ഡ്രൈവറെ ചോദ്യം ചെയ്ത ശേഷമാണ് പ്രോസിക്യൂഷൻ കസ്റ്റഡി നടപടി സ്വീകരിച്ചത്. ആശുപത്രിയിൽ ചികിത്സയിൽ കഴിയുന്ന സാഹചര്യത്തിൽ ആവശ്യമായ സുരക്ഷാ ക്രമീകരണങ്ങളോടെയാണ് കസ്റ്റഡി തുടരുന്നത്. അപകടത്തിന്റെ ഉത്തരവാദിത്വം ആർക്കാണെന്ന് ഇപ്പോൾ അന്തിമമായി പ്രഖ്യാപിച്ചിട്ടില്ല. സാക്ഷികളുടെയും പരുക്കേറ്റവരുടെയും മൊഴികളും അന്വേഷണസംഘം രേഖപ്പെടുത്തുന്നുണ്ട്. പരിശോധനകളുടെ ഫലം പുറത്തുവരുന്നതോടെ അപകടത്തിന്റെ പൂർണ ചിത്രം വ്യക്തമാകുമെന്നാണ് അധികൃതർ വ്യക്തമാക്കുന്നത്.

അതേസമയം, ഈ അപകടത്തിന്റെ വ്യാപ്തി ഞെട്ടിക്കുന്നതാണ്. അഞ്ച് ട്രക്കുകളും 18 മറ്റു വാഹനങ്ങളുമുൾപ്പെടെ ആകെ 23 വാഹനങ്ങളാണ് ദുരന്തത്തിൽപ്പെട്ടത്. നിയന്ത്രണം വിട്ട ട്രക്കിൽ തീപിടിക്കുകയും അതിവേഗം മറ്റു വാഹനങ്ങളിലേക്കും തീ പടരുകയുമായിരുന്നു. വാഹനങ്ങൾക്കുള്ളിൽ കുടുങ്ങിയവരെ രക്ഷപ്പെടുത്താൻ അടിയന്തര രക്ഷാസേനയും അഗ്നിരക്ഷാ വിഭാഗവും പൊലീസും ഏറെ പരിശ്രമിച്ചു.

14 പേരാണ് അപകടത്തിൽ മരിച്ചത്. 30 പേർക്ക് പരുക്കേറ്റു. പരുക്കേറ്റവരിൽ 15 പേർ ചികിത്സയ്ക്കുശേഷം ആശുപത്രി വിട്ടു. ബാക്കിയുള്ള 15 പേർക്ക് ആശുപത്രിയിൽ ചികിത്സ തുടരുകയാണ്. മരിച്ചവരിലും പരുക്കേറ്റവരിലും വിവിധ രാജ്യക്കാരുണ്ട്. യുഎഇ, ഒമാൻ, ഇന്ത്യ, ബ്രസീൽ, പാക്കിസ്ഥാൻ, ജോർദാൻ, ഈജിപ്ത് തുടങ്ങിയ രാജ്യക്കാരാണ് അപകടത്തിന്റെ ഇരകളായത്.

മരിച്ചവരിൽ ചിലരെ തിരിച്ചറിയുന്നതിനായി ഡിഎൻഎ പരിശോധനയും നടത്തിവരികയാണ്. മൃതദേഹങ്ങളുടെ ഫോറൻസിക് പരിശോധനയ്ക്കും കുടുംബാംഗങ്ങളിൽനിന്ന് ശേഖരിച്ച സാമ്പിളുകളുമായി താരതമ്യം ചെയ്യുന്നതിനും പ്രോസിക്യൂഷൻ നിർദേശം നൽകിയിട്ടുണ്ട്.

ഈ ദുരന്തത്തിൽ മലയാളി കുടുംബത്തിലെ മൂന്ന് പേരുടെ മരണവും കേരളത്തെ കണ്ണീരിലാഴ്ത്തിയിരുന്നു. മലപ്പുറം വേങ്ങര സ്വദേശികളായ ഇരട്ട സഹോദരങ്ങളായ മുഹമ്മദ് അഷ്മിൽ, മിസ്ന ജുബിൻ, മൂന്നര വയസ്സുകാരൻ മുഹമ്മദ് ഫായിസ് എന്നിവരാണ് മരിച്ചത്. ഒരു കുടുംബത്തിന്റെ പ്രതീക്ഷകളും സന്തോഷങ്ങളുമാണ് നിമിഷങ്ങൾക്കുള്ളിൽ ഇല്ലാതായത്.

അപകടത്തിൽ ആരെങ്കിലും നിയമലംഘനം നടത്തിയിട്ടുണ്ടോ, റോഡ് സുരക്ഷാ മാനദണ്ഡങ്ങൾ പാലിക്കുന്നതിൽ വീഴ്ചയുണ്ടായിട്ടുണ്ടോ എന്നതെല്ലാം അന്വേഷണത്തിലൂടെ കണ്ടെത്തുമെന്ന് യുഎഇ പബ്ലിക് പ്രോസിക്യൂഷൻ വ്യക്തമാക്കിയിട്ടുണ്ട്. കുറ്റക്കാരെന്ന് കണ്ടെത്തുന്നവർക്കെതിരെ നിയമനടപടികൾ സ്വീകരിക്കുമെന്നും അധികൃതർ അറിയിച്ചു.

14 ജീവനുകൾ നഷ്ടമായ ദുരന്തം കേവലം ഒരു വാഹനാപകടമായി അവസാനിക്കരുതെന്നതാണ് പ്രധാനപ്പെട്ട കാര്യം. ട്രക്കിന്റെ സാങ്കേതിക തകരാറാണോ, ഡ്രൈവറുടെ ഭാഗത്തുനിന്നുണ്ടായ വീഴ്ചയാണോ, അതോ റോഡിലെ സുരക്ഷാ ക്രമീകരണങ്ങളിലെ പോരായ്മയാണോ ദുരന്തത്തിന് വഴിയൊരുക്കിയത്? ഈ ചോദ്യങ്ങൾക്കുള്ള ഉത്തരമാണ് ഇനി അന്വേഷണത്തിൽ നിർണായകമാകുക.