ശബരിമല സ്വര്ണ്ണകൊള്ള: പാളികള് ഇളക്കി സാമ്പിളുകള് ശേഖരിച്ച് പരിശോധനയ്ക്ക് എസ്ഐടിക്ക് അനുമതി
ശബരിമല സ്വര്ണ്ണക്കൊള്ള കേസില് പ്രഭാമണ്ഡലത്തിന്റെയും വാതിലിന്റെ മുകള് ഭാഗത്തെയും പാളികള് ഇളക്കി സാമ്പിളുകള് ശേഖരിക്കും. പരിശോധനയ്ക്ക് ഹൈക്കോടതി എസ്ഐടിക്ക് അനുമതി നല്കി. ഹൈക്കോടതി ഇടക്കാല ഉത്തരവ് ട്വന്റിഫോറിന് ലഭിച്ചു. അന്വേഷണത്തില് ഹൈക്കോടതി തൃപ്തി രേഖപ്പെടുത്തി. ഹര്ജി ഈ മാസം 18 ന് വീണ്ടും പരിഗണിക്കും.പാളികളില് പൊതിഞ്ഞിരുന്ന സ്വര്ണം സ്മാര്ട്ട് ക്രിയേഷന്സ് 2019ല് പ്രത്യേകതരം ഉപ്പ് ഉപയോഗിച്ച് വേര്തിരിച്ചെന്നും എസ്ഐടി കോടതിയെ അറിയിച്ചു.
ഇതിന്റെ സാമ്പിള് ലാബ് പരിശോധനയ്ക്ക് അയച്ചിട്ടുണ്ടെന്നും എസ്.ഐ.ടി. ഈ സാമ്പിളുകളുടെ ലാബ് പരിശോധനാഫലം കവര്ച്ചയുടെ പൂര്ണ്ണമായ വിവരം ലഭിക്കാന് നിര്ണ്ണായകം. കേസില് അന്തിമ റിപ്പോര്ട്ട് ഉടന് സമര്പ്പിക്കും. ജംഷഡ്പൂരിലെ ലാബില് നടത്തിയ സ്വര്ണ്ണപ്പാളികളുടെ ശാസ്ത്രീയ പരിശോധന ഫലത്തിന്റെ വിവരങ്ങള് കോടതിയെ അറിയിച്ചിരുന്നു.
പാളികള് മാറ്റിയില്ലെന്നും, പൊതിഞ്ഞിരുന്ന സ്വര്ണ്ണം മാത്രമാണ് തട്ടിയെടുത്തതെന്നും പരിശോധന ഫലത്തിന്റെ കണ്ടെത്തല്. ശബരിമല സ്വര്ണ്ണക്കൊള്ളയുമായി ബന്ധപ്പെട്ട കേസിലെ മുഴുവന് പ്രതികളും ജാമ്യത്തിലിറങ്ങിയിരുന്നു. ശബരിമല സ്വര്ണ്ണക്കൊള്ളയില് എസ്ഐടി അന്വേഷണം ആരംഭിച്ചിട്ട് 7 മാസം കഴിഞ്ഞു.
https://www.facebook.com/Malayalivartha
