പാലക്കാട് സ്വന്തം എംഎല്‍എ ഓഫിസ് ഉദ്ഘാടനം ചെയ്യാന്‍ കുടുംബസമേതമെത്തി രമേഷ് പിഷാരടി. സൗമ്യയ്ക്കും മക്കളായ പൗര്‍ണമി, ഗിരിധര്‍, ഗോവര്‍ദ്ധന്‍ എന്നിവര്‍ക്കൊപ്പമാണ് താരം പാലക്കാട് എത്തിയത്. ഓഫിസ് ഉദ്ഘാടത്തിനു മുറിക്കാനുള്ള കത്രികയടക്കം എല്ലാ തയാറെടുപ്പുകളും നടത്തിയത് ഗിരിധറും ഗോവര്‍ദ്ധനും ചേര്‍ന്നായിരുന്നു. ഓഫിസ് ഉദ്ഘാടനം വി.കെ.ശ്രീകണ്ഠന്‍ എംപി നിര്‍വഹിച്ചു. നാടിന്റെ വികസനത്തിനും നാട്ടുകാരുടെ ക്ഷേമത്തിനും ഉള്ള ജനകീയ ഓഫിസായിരിക്കും ഇതെന്ന് അദ്ദേഹം പറഞ്ഞു.

111 ദിവസത്തിനുള്ളില്‍ 111 വികസന പദ്ധതികള്‍ പൂര്‍ത്തിയാക്കി നാടിനു സമര്‍പ്പിക്കുമെന്ന പ്രഖ്യാപനത്തോടെ രമേഷ് പിഷാരടി എംഎല്‍എയുടെ ഓഫിസ് ഉദ്ഘാടനം ചെയ്തു. മുന്‍ എംഎല്‍എമാര്‍ തുടങ്ങിവച്ചതും, പുതുതായി തുടങ്ങുന്നതും സാങ്കേതികത്വത്തില്‍ കിടക്കുന്നതും ഉള്‍പ്പെടെ നിയോജകമണ്ഡലത്തിലെ 111 പദ്ധതികളാണ് പൂര്‍ത്തിയാക്കുകയെന്ന് രമേഷ് പിഷാരടി എംഎല്‍എ പറഞ്ഞു. എംഎല്‍എ എന്ന നിലയില്‍ പൂര്‍ണ സേവനം ജനങ്ങള്‍ക്കു നല്‍കാനായി ഈ കാലയളവില്‍ സിനിമയും സ്‌റ്റേജ് പ്രോഗ്രാമുകളും ഒഴിവാക്കാനാണു തീരുമാനം.

പാലക്കാട് നടന്ന വാശിയേറിയ പോരാട്ടത്തിനൊടുവില്‍ മികച്ച ഭൂരിപക്ഷത്തോടെയാണ് പിഷാരടി നിയമസഭയിലേക്ക് തിരഞ്ഞെടുക്കപ്പെട്ടത്. 12,422 വോട്ടുകളുടെ വ്യക്തമായ ഭൂരിപക്ഷമാണ് അദ്ദേഹം സ്വന്തമാക്കിയത്. രമേഷ് പിഷാരടി 55,302 വോട്ടുകള്‍ നേടിയപ്പോള്‍ രണ്ടാം സ്ഥാനത്തെത്തിയ എന്‍.ഡി.എ സ്ഥാനാര്‍ത്ഥി ശോഭ സുരേന്ദ്രന് 42,880 വോട്ടുകള്‍ മാത്രമേ ലഭിച്ചുള്ളൂ.

അവതാരകന്‍, നടന്‍, സംവിധായകന്‍ എന്നീ നിലകളില്‍ കലാ സാംസ്‌കാരിക രംഗത്ത് സജീവസാന്നിധ്യമാണ് രമേഷ് പിഷാരടി. സലിം കുമാറിന്റെ 'കൊച്ചിന്‍ സ്റ്റാലിയന്‍സ്' എന്ന മിമിക്രി ട്രൂപ്പിലൂടെയാണ് അദ്ദേഹം തന്റെ കരിയര്‍ ആരംഭിച്ചത്. പിന്നീട് ധര്‍മ്മജന്‍ ബോള്‍ഗാട്ടിക്കൊപ്പം ചേര്‍ന്ന് മലയാളികളെ പൊട്ടിച്ചിരിപ്പിച്ച പിഷാരടി, ചുരുങ്ങിയ കാലം കൊണ്ട് തന്നെ ടെലിവിഷന്‍ രംഗത്തെ അനിഷേധ്യ സാന്നിധ്യമായി മാറി.2008ല്‍ 'പോസിറ്റീവ്' എന്ന ചിത്രത്തിലൂടെ സിനിമാഭിനയത്തില്‍ തുടക്കം കുറിച്ച അദ്ദേഹം പിന്നീട് 'പഞ്ചവര്‍ണ്ണതത്ത', 'ഗാനഗന്ധര്‍വ്വന്‍' എന്നീ ചിത്രങ്ങളിലൂടെ സംവിധായകനായും തന്റെ പ്രതിഭ തെളിയിച്ചു.