സംസ്ഥാനത്ത് വരും മണിക്കൂറുകളിൽ മഴ കനക്കുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. തലസ്ഥാനത്ത് ഉൾപ്പെടെ ഇടവേളകളില്ലാതെ മഴ തുടരുന്ന സാഹചര്യമാണുള്ളത്. മഴയ്‌ക്കൊപ്പം തന്നെ മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റ് വീശാനും സാധ്യത.

സംസ്ഥാനത്തെ മിക്ക ജില്ലകളിലും മഴ ശക്തമായി തുടരുകയാണ്. പുതിയ അലർട്ട് പ്രകാരം സംസ്ഥാനത്തെ പ്രധാനപ്പെട്ട ഒട്ടുമിക്ക ജില്ലകളിലും ഓറഞ്ച് അലർട്ട് നിലനിൽക്കുന്നുണ്ട്. തിരുവനന്തപുരത്തും ഇടുക്കിയിലും പെട്ടെന്നുള്ള മഴസാഹചര്യം കണക്കിലെടുത്ത് വരും മണിക്കൂറുകളിൽ പ്രത്യേക ജാഗ്രതയും നിർദേശിച്ചിട്ടുണ്ട്. സംസ്ഥാനത്തെ മറ്റു ജില്ലകളിലെല്ലാം ഇന്നലെ യെല്ലോ അലർട്ടാണ് പ്രഖ്യാപിച്ചിരുന്നു

ഇന്ന് സംസ്ഥാനത്ത് ശക്തമായ മഴ തുടരുമെന്നാണ് കാലാവസ്ഥാ വകുപ്പ് നൽകുന്ന മുന്നറിയിപ്പ്. വടക്കൻ കേരളത്തിൽ ഇന്ന് മഴ സജീവമാകും. കോഴിക്കോട് മുതൽ കാസർകോട് വരെയുള്ള ജില്ലകളിലും, തൃശൂർ, എറണാകുളം, ഇടുക്കി, കോട്ടയം, പത്തനംതിട്ട ജില്ലകളിലും ഇന്ന് യെല്ലോ അലർട്ട് പ്രഖ്യാപിച്ചിട്ടുണ്ട്. വടക്കൻ കേരളത്തിന് പുറമെ മധ്യകേരളത്തിലും മഴ കനക്കാൻ സാധ്യത.

കടലിൽ മോശം കാലാവസ്ഥ തുടരുന്നതിനാൽ മത്സ്യത്തൊഴിലാളികൾക്ക് കർശന ജാഗ്രതാ നിർദേശം നൽകി. മണിക്കൂറിൽ 60 കിലോമീറ്റർ വരെ വേഗതയിൽ ശക്തമായ കാറ്റ് വീശിയടിച്ചേക്കാവുന്നതിനാൽ കേരള തീരത്ത് നിന്ന് ആരും മത്സ്യബന്ധനത്തിനായി കടലിൽ പോകാൻ പാടുള്ളതല്ലെന്ന് അധികൃതർ വ്യക്തമാക്കി. ജനങ്ങൾ ജാഗ്രത പാലിക്കേണ്ടതുമാണ്.