ഓൺലൈൻ പരസ്യങ്ങൾ കണ്ട് കല്യാണത്തിന് കാറ്ററിങ് ബുക്ക് ചെയ്യുന്നവർ ജാഗ്രതൈ! കോട്ടയത്ത് വലിയ തോതിൽ അഡ്വാൻസ് തുക വാങ്ങി വിവാഹദിവസം സദ്യ എത്തിക്കാതെ മുങ്ങിയ കാറ്ററിങ് സ്ഥാപനത്തിന്റെ ഉടമയെ പോലീസ് പൊക്കി. കാഞ്ഞിരപ്പള്ളി കേന്ദ്രമായി പ്രവർത്തിക്കുന്ന 'ഉദയം കാറ്ററിങ്' ഉടമ വിഷ്ണു മോഹനെയാണ് കോട്ടയം ഈസ്റ്റ് പോലീസ് കസ്റ്റഡിയിലെടുത്തത്. കഴിഞ്ഞ സെപ്റ്റംബർ 13ന് മുണ്ടക്കയം, കഞ്ഞിക്കുഴി, പെരുമ്പാവൂർ എന്നിവിടങ്ങളിലെ മൂന്ന് വിവാഹങ്ങൾക്കാണ് ഇയാൾ ഒരേസമയം ഓർഡർ എടുത്തത്. ലക്ഷങ്ങൾ മുൻകൂറായി വാങ്ങിയിട്ടും കല്യാണദിവസം ഒരിടത്തുപോലും ഭക്ഷണം എത്തിച്ചില്ല. ഫോൺ സ്വിച്ച് ഓഫ് ചെയ്ത് മുങ്ങിയ പ്രതിയെ പോലീസ് തന്ത്രപൂർവ്വം സ്റ്റേഷനിലേക്ക് വിളിച്ചുവരുത്തി അറസ്റ്റ് ചെയ്യുകയായിരുന്നു. ഭാരതീയ ന്യായ സംഹിതയിലെ വകുപ്പുകൾ പ്രകാരമാണ് ഇയാൾക്കെതിരെ ഇപ്പോൾ കേസെടുത്തിരിക്കുന്നത്.