രക്താർബുദം ബാധിച്ച ഒൻപതുമാസം പ്രായമുള്ള കുഞ്ഞിന് റീജിയണൽ കാൻസർ സെന്ററിലെ  ചികിത്സക്കിടയിൽ ചികിത്സാപ്പിഴവുണ്ടായെന്ന രക്ഷാകർത്താക്കളുടെ പരാതിയെ കുറിച്ച് വിദഗ്ദ്ധ ഡോക്ടർമാരുടെ പാനൽ രൂപീകരിച്ച് അന്വേഷണം നടത്തണമെന്ന്  സംസ്ഥാന മനുഷ്യാവകാശ കമ്മീഷൻ ചെയർപേഴ്സൺ ജസ്റ്റിസ് അലക്സാണ്ടർ തോമസ് മെഡിക്കൽ വിദ്യാഭ്യാസ ഡയറക്ടർക്ക് നിർദ്ദേശം നൽകി.

പത്രവാർത്തയുടെ അടിസ്ഥാനത്തിൽ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് ഉത്തരവ്.  കുഞ്ഞിന്റെ ഇടത്തെ കൈപ്പത്തിയിൽ കാനുല ഘടിപ്പിച്ച ഭാഗത്ത് പിന്നീട് അണുബാധയുണ്ടായെന്നും ചികിത്സിച്ചവർ ഇത് അവഗണിച്ചതിനെ തുടർന്ന് കുഞ്ഞിന്റെ ആരോഗ്യനില വഷളായി വെന്റിലേറ്ററിൽ പ്രവേശിപ്പിക്കേണ്ട സാഹചര്യമുണ്ടായെന്നുമാണ് പരാതി.

ഡി.എം.ഇ നിയോഗിക്കുന്ന ഡോക്ടർമാരുടെ പാനലിൽ കുഞ്ഞിനുണ്ടായ ബുദ്ധിമുട്ടിനെ കുറിച്ച് ആഴത്തിൽ മനസിലാക്കാൻ കഴിയുന്ന വിദഗ്ദ്ധരെ അംഗങ്ങളാക്കണമെന്ന് കമ്മീഷൻ നിർദ്ദേശിച്ചു. സമഗ്രമായ അന്വേഷണം നടത്തി ഗുരുതരമായ ചികിത്സാപിഴവ് സംഭവിച്ചിട്ടുണ്ടോ എന്ന് കണ്ടെത്തണം.  കുഞ്ഞിനുണ്ടായ അണുബാധക്ക് കാരണം രക്താർബുദമാണെന്ന ആർ.സി.സി യുടെ വാദവും കാനുല ഘടിപ്പിച്ചപ്പോഴുണ്ടായ പിഴവാണെന്ന രക്ഷാകർത്താക്കളുടെ വാദവും സുതാര്യവും സമഗ്രവുമായി പരിശോധിക്കണം. 

കാനുല ഘടിപ്പിക്കുന്നതിന് മുമ്പ് അണുവിമുക്തമാക്കിയോ എന്നും പരിശോധിക്കണം.  അണുബാധക്കുള്ള കാരണം കണ്ടെത്തുന്നതിനുള്ള ടെസ്റ്റുകൾ നടത്തിയിട്ടുണ്ടോ, ഉണ്ടെങ്കിൽ അതിന്റെ ഫലം എന്നിവ അന്വേഷണ സംഘം പരിശോധിക്കണം.  കുഞ്ഞിന് നൽകിയ ചികിത്സയുടെ റെക്കാർഡുകൾ പൂർണമായും പരിശോധിക്കണം. ഡോക്ടർമാരുടെയും മറ്റ് ജീവനക്കാരുടെയും മൊഴിയെടുക്കണം. കാനുല ഘടിപ്പിച്ച നഴ്സിന്റെ മൊഴിയും സംഘം രേഖപ്പെടുത്തണം.