പവര്‍ എക്‌സ്‌ചേഞ്ച് വഴി ആവശ്യത്തിന് വൈദ്യുതി ലഭ്യമാകാത്തതിനാല്‍ സംസ്ഥാനത്ത് ഇന്നും വൈദ്യുതി നിയന്ത്രണമുണ്ടായേക്കുമെന്ന് കെഎസ്ഇബിയുടെ മുന്നറിയിപ്പ്. 900 മെഗാവാട്ടിന്റെ കുറവുണ്ട്. മദ്ധ്യപ്രദേശില്‍ നിന്ന് വൈദ്യുതി കിട്ടിയില്ലെന്നും കെഎസ്ഇബി അറിയിച്ചു. വൈകിട്ട് 6.15നും അര്‍ദ്ധരാത്രി 12.45നും ഇടയിലുള്ള സമയത്താകും പവര്‍കട്ട്.

പവര്‍ എക്‌സ്‌ചേഞ്ച് വഴി ആവശ്യത്തിന് വൈദ്യുതി ലഭിച്ചില്ലെങ്കില്‍ നിയന്ത്രണം ഏര്‍പ്പെടുത്തുകയല്ലാതെ മറ്റുമാര്‍ഗങ്ങളില്ലെന്ന് അധികൃതര്‍ വ്യക്തമാക്കി. സംസ്ഥാനത്തെ പ്രതിദിന വൈദ്യുതി ഉപഭോഗം 99 ദശലക്ഷം യൂണിറ്റിലേക്ക് കുതിക്കുകയാണെന്നാണ് റിപ്പോര്‍ട്ട്. പീക്ക് അവറിലെ വൈദ്യുതി ആവശ്യകത 5000 മെഗാവാട്ടിന് മുകളിലേയ്ക്ക് ഉയര്‍ന്നത് മുന്‍ വര്‍ഷങ്ങളിലെ കടുത്ത വേനല്‍ക്കാലത്തിന് സമാനമായ സാഹചര്യമാണ് സൃഷ്ടിച്ചിരിക്കുന്നതെന്നും അധികൃതര്‍ വ്യക്തമാക്കുന്നു.

പ്രതീക്ഷിച്ച രീതിയില്‍ മഴ ലഭിക്കാത്തതാണ് പ്രതിസന്ധി രൂക്ഷമാക്കിയതെന്നും അവര്‍ പറഞ്ഞു. വൈദ്യുതി പ്രശ്‌നം പരിഹരിക്കാന്‍ കെഎസ്ഇബി സിഎംഡി എന്‍ എസ് രാജമാണിക്യം ഉള്‍പ്പെടെയുള്ള ഉന്നത ഉദ്യോഗസ്ഥര്‍ മഹാരാഷ്ട്രയുമായി ചര്‍ച്ച നടത്തിയെങ്കിലും ഫലം കണ്ടില്ല. ഹിമാചല്‍പ്രദേശില്‍ നിന്ന് 250 മെഗാവാട്ട് ലഭിക്കുമെന്ന് പ്രതീക്ഷിച്ചിരുന്നെങ്കിലും പീക്ക് അവറില്‍ 70 മെഗാവാട്ട് മാത്രമാണ് നിലവില്‍ കേരളത്തിന് ലഭിക്കുന്നതെന്നും അധികൃതര്‍ പറഞ്ഞു. ഈ മാസം 30ാം തീയതി വരെ സംസ്ഥാനത്ത് വൈദ്യുതി നിയന്ത്രണം തുടരുമെന്നാണ് കെഎസ്ഇബിയും വൈദ്യുതി മന്ത്രി സണ്ണി ജോസഫും നല്‍കുന്ന സൂചന.