താലിബാന് തടഞ്ഞുവച്ച ട്രാവല് വ്ളോഗറായ മലയാളി യുവതി അരുണിമ കേരളത്തില് തിരിച്ചെത്തി
യാത്രയില് ഇങ്ങനെ ഓരോ സംഭവങ്ങള് നടക്കുമ്പോഴാണ് സ്വന്തം നാടിന്റെ വില ശരിക്കും മനസിലാകുന്നതെന്ന് വ്ളോഗര് അരുണിമ. അഫ്ഗാനിസ്ഥാനില് താലിബാന് തടഞ്ഞുവച്ചതിന് ശേഷം ട്രാവല് വ്ളോഗറായ മലയാളി യുവതി അരുണിമ കേരളത്തില് തിരിച്ചെത്തി. കാബൂളില് നിന്ന് ഡല്ഹി വഴിയാണ് അരുണിമ നാട്ടിലെത്തിയത്. യാത്രയിലെ ദുരനുഭവങ്ങളും സഹായം നല്കിയവര്ക്ക് നന്ദി അറിയിച്ചുകൊണ്ടും അരുണിമ സോഷ്യല് മീഡിയയില് തന്റെ അനുഭവങ്ങള് പങ്കുവച്ചു. ഇന്ത്യന് എംബസിയുടെയും കേന്ദ്ര മന്ത്രി സുരേഷ് ഗോപിയുടെയും സഹായത്തിനും അരുണിമ പ്രത്യേകം നന്ദി അറിയിച്ചു. ബാമിയനില് നിന്ന് കാബൂളിലേക്കുള്ള യാത്രയിലുടനീളം ഇന്ത്യന് എംബസിയുടെ പിന്തുണയും ഇടപെടലും ഉണ്ടായിരുന്നുവെന്നും അരുണിമ സോഷ്യല് മീഡിയ പോസ്റ്റില് വ്യക്തമാക്കി.
അരുണിമയുടെ വാക്കുകള്
'ആദ്യമായി എനിക്ക് നന്ദി പറയാനുള്ളത് ഇന്ത്യന് എംബസിയോടും ബഹുമാനപ്പെട്ട ശ്രീ സുരേഷ് ഗോപിയോടുമാണ്. ഞാന് വളരെ മോശമായൊരു സാഹചര്യത്തിലൂടെയാണ് കടന്നുപോയിരുന്നത്. ഇന്ത്യന് എംബസിയും ശ്രീ സുരേഷ് ഗോപിയും എന്റെ ഫാദറിനെ വിളിച്ച് സംസാരിക്കുകയും, പിന്നീട് എന്നെ വിളിച്ച് എല്ലാ സൗകര്യങ്ങളും ഒരുക്കിത്തരുകയും ചെയ്തു. ബമിയന് പ്രൊവിന്സിലെ ഗവണ്മെന്റ് ഒഫീഷ്യല്സ് എന്റെ ഹോട്ടലിലെത്തി എന്റെ സുരക്ഷ ഉറപ്പാക്കി. അവിടെ നിന്ന് സര്ക്കാര് വാഹനത്തില് സുരക്ഷിതമായി കാബൂളിലെത്തിച്ച് ഇന്ത്യന് എംബസിയെ ഏല്പ്പിച്ചു. കാബൂളില് എത്തിയപ്പോള് എംബസിയിലെ ഡ്രൈവര് എന്നെ പിക്ക് ചെയ്ത് ഹോട്ടലില് എത്തിച്ചു.
രാത്രി വളരെ വൈകിയാണ് അവിടെ എത്തിയത്. രാവിലെ തന്നെ എംബസി എനിക്ക് ഇന്ത്യയിലേക്കുള്ള ഫ്ളൈറ്റ് ഒരുക്കിയിരുന്നു. എയര്പോര്ട്ടിലെത്തിയപ്പോള് വീണ്ടും വലിയൊരു അനുഭവം. ഇലക്ട്രിസിറ്റി ഇല്ല, ഫ്ളൈറ്റ് ഡിലേ, പിന്നീട് മണിക്കൂറുകളോളം എന്താണ് സംഭവിക്കുന്നതെന്ന് ഒരു വിവരവുമില്ല. ഒരുപാട് ഫ്ളൈറ്റുകള് ക്യാന്സല് ആയിക്കൊണ്ടിരുന്നതിനാല് ഞാന് ശരിക്കും ഭയന്നു.
ഒടുവില് ഉച്ചയ്ക്ക് ഒരു മണിയോടെ ബോര്ഡിംഗ് തുടങ്ങി. ഫ്ളൈറ്റില് ഞാന് മാത്രമായിരുന്നു ഒരു പെണ്കുട്ടി. ഏകദേശം 25ഓളം പാസഞ്ചേഴ്സും, എയര്ഹോസ്റ്റസും പൈലറ്റും ഉള്പ്പെടെ ബാക്കിയുള്ളവരെല്ലാം പുരുഷന്മാര്. അങ്ങനെ ഒടുവില് ഡല്ഹിയില് എത്തി, അവിടെ നിന്ന് ഫ്ളൈറ്റ് മാറ്റി ബുക്ക് ചെയ്ത് കൊച്ചിയിലെത്തി. വീട്ടിലെത്തിയ ആ നിമിഷം... യാത്രയില് ഇങ്ങനെ ഓരോ സംഭവങ്ങള് നടക്കുമ്പോഴാണ് സ്വന്തം നാടിന്റെ വില ശരിക്കും മനസിലാകുന്നത്. എത്ര ദൂരേക്ക് പോയാലും, ഒടുവില് സ്വന്തം നാട്ടില് തിരിച്ചെത്തുമ്പോള് കിട്ടുന്ന സമാധാനം... അത് വേറെ തന്നെയാണ്'. അരുണിമ കൂട്ടിച്ചേര്ത്തു.
https://www.facebook.com/Malayalivartha
