ക്രൈംബ്രാഞ്ച് ആസ്ഥാനത്ത് ചോദ്യം ചെയ്യലിനു ഹാജരാകുന്നതില്‍ പിഎസ്‌സി അംഗങ്ങള്‍ക്ക് പ്രത്യേക പരിരക്ഷയില്ലെന്ന് നിയമോപദേശം. ആസൂത്രണ ബോര്‍ഡ് പരീക്ഷാ ക്രമക്കേടില്‍ ചോദ്യം ചെയ്യലിന് ഹാജരാകാന്‍ പിഎസ്‌സി അംഗങ്ങള്‍ക്ക് ക്രൈംബ്രാഞ്ച് അന്വേഷണ സംഘം വീണ്ടും നോട്ടിസ് നല്‍കും. പിഎസ്‌സി വീണ്ടും നിരസിച്ചാല്‍ വാറന്റിനായി കോടതിയെ സമീപിക്കാനാണ് ഐജി അജിതാ ബേഗത്തിന്റെ നേതൃത്വത്തിലുള്ള എസ്‌ഐടിയുടെ തീരുമാനം.

ക്രൈംബ്രാഞ്ച് ഓഫിസില്‍ ചോദ്യം ചെയ്യലിനു ഹാജരാകാനുള്ള എസ്‌ഐടിയുടെ നോട്ടിസ് നേരത്തേ പിഎസ്‌സി തള്ളിയിരുന്നു. ഭരണഘടനാ സ്ഥാപനമാണന്നും നിയമ പരിരക്ഷയുണ്ടെന്നും വാദിച്ച അംഗങ്ങള്‍, പിഎസ്‌സി ഓഫിസില്‍വച്ച് മൊഴി നല്‍കാമെന്ന് അറിയിച്ചു. ഇതിന്റെ പശ്ചാത്തലത്തിലാണ് അന്വേഷണ സംഘം നിയമോപദേശം തേടിയത്.

പിഎസ്‌സി അംഗങ്ങളായ എസ്.എ.സെയ്ഫ്, എസ്.ശ്രീകുമാര്‍, സി.കെ.ഷാജിബ്, സ്റ്റാനി തോമസ് എന്നിവര്‍ക്കാണ് കഴിഞ്ഞയാഴ്ച ക്രൈംബ്രാഞ്ച് നോട്ടിസ് അയച്ചത്. ഇവരാരും ഹാജരായിരുന്നില്ല. ഈ 4 പേര്‍ക്കും വീണ്ടും നോട്ടിസ് നല്‍കും. അതിനുശേഷം പിഎസ്‌സി ചെയര്‍മാന്‍ എം.ആര്‍.ബൈജുവിനെ ചോദ്യം ചെയ്യുന്ന കാര്യവും പരിഗണനയിലുണ്ട്.