ഇന്ത്യൻ ക്രിക്കറ്റ് താരം സഞ്ജു സാംസൺ ഡൽഹി സർക്കാരിന്റെ ബ്രാൻഡ് അംബാസഡറായി... ഡൽഹി സെക്രട്ടേറിയേറ്റിലെത്തി മുഖ്യമന്ത്രി രേഖാ ഗുപ്തയുമായി കൂടിക്കാഴ്ച നടത്തിയ സഞ്ജു ബ്രാൻഡ് അംബാസഡറായി ചുമതലയേറ്റതിന് പിന്നാലെ ജൻ കൗശൽ കേന്ദ്രയുടെ പോസ്റ്റർ പുറത്തിറക്കി

ഇന്ത്യൻ ക്രിക്കറ്റ് താരം സഞ്ജു സാംസൺ ഡൽഹി സർക്കാരിന്റെ ബ്രാൻഡ് അംബാസഡറായി. സഞ്ജുവും മുഖ്യമന്ത്രി രേഖാ ഗുപ്തയും ചേർന്ന് ഡൽഹി സർക്കാരിന്റെ ജൻ കൗശൽ ക്രേന്ദ്രയുടെ പ്രചാരണത്തിനായി സഞ്ജുവിന്റെ ചിത്രത്തോട് കൂടിയ ഔദ്യോഗിക പോസ്റ്റർ പുറത്തിറക്കി.

ഡൽഹി സർക്കാരിന്റെ യുവ ശാക്തീകരണ പദ്ധതികളുടേയും എഐ ഡിജിറ്റൽ സാങ്കേതിക വിദ്യയുടേയും ഒക്കെ പ്രവർത്തനങ്ങൾ ജൻ കൗശൽ ക്രേന്ദ്രയിലൂടെയാണ് നടക്കുക. മുഖ്യമന്ത്രിയുടെ മണ്ഡലമായ ഷാലിമാർ ബാഗിൽ ജൻ കൗശൽ കേന്ദ്രയുടെ കീഴിൽ സെന്റർ ഓഫ് എക്‌സലൻസ് സ്ഥാപിക്കുന്നതിനായുള്ള ആലോചന സർക്കാർ തലത്തിൽ നടക്കുന്നു.

അടുത്ത ഒരു വർഷത്തിൽ ഒരു കോടി പേരെ ആർട്ടിഫിഷ്യൽ ഇന്റലിജൻസ് മേഖലയിൽ നൈപുണ്യമുള്ളവരാക്കി മാറ്റുക എന്ന പ്രധാനമന്ത്രിയുടെ കാഴ്ച്ചപ്പാട് യുവാക്കളിലേക്ക് എത്തിക്കുന്നതിനായി സഞ്ജുവിന്റെ വീഡിയോ സന്ദേശവുമുണ്ടാകും. സഞ്ജുവിനെ ജൻ കൗശൽ കേന്ദ്ര ബ്രാൻഡ് അംബാസഡറാക്കിയതിലൂടെ യുവാക്കളെ ആകർഷിക്കാനാകുമെന്നാണ് ഡൽഹി സർക്കാരിന്റെ വിലയിരുത്തലുകളുള്ളത്.