തീക്കോയില് മണ്ണിടിച്ചിലില് ഇരുചക്രവാഹന യാത്രികയ്ക്ക് ദാരുണാന്ത്യം
കനത്ത മഴയ്ക്കിടെ തീക്കോയില് മണ്ണിടിച്ചിലില്പ്പെട്ട് ഇരുചക്രവാഹന യാത്രക്കാരിക്ക് ദാരുണാന്ത്യം. വേലത്തുശ്ശേരിയിലുണ്ടായ അപകടത്തില് തേനി സ്വദേശി സംഗീത അരുള്ലാല് ആണ് മരിച്ചത്. മഴ ശക്തമായതിനെ തുടര്ന്ന് മലയോര മേഖലകളില് അപകടസാധ്യത ഉയരുന്നതിനിടെയാണ് ദുരന്തം.
കോട്ടയം ജില്ലയിലെ കിഴക്കന് മേഖലയില് ഇന്നലെ ഉച്ചമുതല് ശക്തമായ മഴയാണ് അനുഭവപ്പെടുന്നത്. വാഗമണ് മേഖലയിലെ കുസാറ്റിന്റെ ഓട്ടോമാറ്റിക് വെതര് സ്റ്റേഷനില് ഉച്ചയ്ക്ക് മൂന്നിനും അഞ്ചിനുമിടയില് 157 മില്ലിമീറ്റര് മഴ രേഖപ്പെടുത്തി. മഴയെ തുടര്ന്ന് ഈരാറ്റുപേട്ട–വാഗമണ് റോഡിലും മണ്ണിടിച്ചിലുണ്ടായി. കാരികാട് ടോപ്പിന് സമീപം റോഡിലേക്ക് മണ്ണ് ഇടിഞ്ഞുവീണതോടെ രണ്ട് കാറുകള്ക്ക് സമീപത്തേക്ക് മണ്ണെത്തി. വാഹനങ്ങളിലുണ്ടായിരുന്നവര്ക്ക് പരിക്കേറ്റിട്ടില്ല. മണ്ണിടിച്ചിലിനെ തുടര്ന്ന് മണിക്കൂറുകളോളം ഗതാഗതം തടസപ്പെട്ടു. രാത്രി ഏഴോടെയാണ് ഗതാഗതം പുനഃസ്ഥാപിച്ചത്.
മലപ്പുറം ടി.കെ. കോളനിയില് കോട്ടപ്പുഴയിലുണ്ടായ മലവെള്ളപ്പാച്ചിലില് നാലുപേര് ഒഴുക്കില്പ്പെട്ടു. ഒരാളുടെ മൃതദേഹം കണ്ടെത്തി. മറ്റുള്ളവര്ക്കായി തിരച്ചില് തുടരുകയാണ്. അടുത്ത മൂന്ന് മണിക്കൂറില് ഇടുക്കിയിലും കോട്ടയത്തും ഓറഞ്ച് അലര്ട്ട് പ്രഖ്യാപിച്ചു. മണിക്കൂറില് 40 കിലോമീറ്റര് വരെ വേഗത്തില് ശക്തമായ കാറ്റിന് സാധ്യതയുണ്ടെന്നാണ് മുന്നറിയിപ്പ്.
വെള്ളിക്കുളം, തീക്കോയ് പ്രദേശങ്ങളിലും മഴ ശക്തമായി തുടരുകയാണ്. മലയോര മേഖലകളില് മണ്ണിടിച്ചിലും മലവെള്ളപ്പാച്ചിലും ഉണ്ടാകാന് സാധ്യതയുള്ളതിനാല് അനാവശ്യ യാത്രകള് ഒഴിവാക്കണമെന്ന് അധികൃതര് മുന്നറിയിപ്പ് നല്കി. മീനച്ചിലാറ്റിലെ ജലനിരപ്പ് ഉയരാനുള്ള സാധ്യതയും നിലനില്ക്കുന്നുണ്ട്. ഇതോടെ തീക്കോയ്, ഈരാറ്റുപേട്ട, പാലാ മേഖലകളിലെ താഴ്ന്ന പ്രദേശങ്ങളില് വെള്ളം കയറാനുള്ള സാധ്യതയുണ്ട്.
https://www.facebook.com/Malayalivartha
