കേരളത്തിന്റെ മുൻ പൊലീസ് മേധാവി ടോമിൻ ജെ. തച്ചങ്കരി വീണ്ടും ഹൈക്കോടതിയുടെ രൂക്ഷവിമർശനത്തിന് വിധേയനായിരിക്കുകയാണ്. ജയിലിൽ കഴിയുമ്പോൾ ഗുരുതര രോഗങ്ങൾ, പുറത്തിറങ്ങിയാൽ വിദേശത്ത് പോയി ജോലി ചെയ്യണം! ഈ വൈരുധ്യം ചൂണ്ടിക്കാട്ടിയാണ് ഹൈക്കോടതിയുടെ ചോദ്യം. കോടതിക്ക് മുന്നിൽ നുണകൾ ആവർത്തിക്കരുതെന്നും ഇത്തരത്തിലുള്ള രീതികൾ ഗൗരവമായി കാണുമെന്നും ജാമ്യം റദ്ദാക്കാനുള്ള നടപടികളിലേക്ക് കടക്കേണ്ടിവരുമെന്നും കോടതി മുന്നറിയിപ്പ് നൽകി. എന്താണ് തച്ചങ്കരിക്കെതിരായ കേസ്? എന്തുകൊണ്ടാണ് ഇപ്പോൾ ഹൈക്കോടതി ഇത്രയും രൂക്ഷമായി പ്രതികരിച്ചത്?

ടോമിൻ ജെ. തച്ചങ്കരി എന്ന മുൻ ഐപിഎസ് ഉദ്യോഗസ്ഥനെതിരായ അനധികൃത സ്വത്ത് സമ്പാദനക്കേസാണ് ഇപ്പോഴത്തെ വിവാദങ്ങളുടെ അടിസ്ഥാനം.

2003 മുതൽ 2007 വരെയുള്ള കാലയളവിൽ ഔദ്യോഗിക പദവിയിലിരിക്കെ അറിയാവുന്ന വരുമാനസ്രോതസ്സുകൾക്ക് അനുപാതമില്ലാത്ത സ്വത്ത് സമ്പാദിച്ചുവെന്നായിരുന്നു വിജിലൻസിന്റെ കേസ്. അതായത്, ഒരു സർക്കാർ ഉദ്യോഗസ്ഥന് ലഭിച്ച ശമ്പളവും മറ്റ് നിയമാനുസൃത വരുമാനവും കണക്കിലെടുക്കുമ്പോൾ അതിനേക്കാൾ അധികമായി സ്വത്തുക്കൾ എങ്ങനെ സ്വന്തമാക്കി എന്നതായിരുന്നു അന്വേഷണത്തിലെ പ്രധാന ചോദ്യം.

കോട്ടയം വിജിലൻസ് കോടതിയിൽ നടന്ന വിചാരണയ്ക്കൊടുവിൽ തച്ചങ്കരി കുറ്റക്കാരനാണെന്ന് കണ്ടെത്തി. വരുമാനവുമായി താരതമ്യം ചെയ്യുമ്പോൾ 52.33 ശതമാനം സ്വത്ത് അധികമാണെന്നും അതിന് തൃപ്തികരമായ വിശദീകരണം നൽകാൻ കഴിഞ്ഞില്ലെന്നുമായിരുന്നു വിചാരണക്കോടതിയുടെ കണ്ടെത്തൽ.

തുടർന്ന് നാല് വർഷത്തെ കഠിനതടവും 30.84 ലക്ഷം രൂപ പിഴയും കോടതി വിധിച്ചു. ഈ വിധിക്കെതിരെ തച്ചങ്കരി ഹൈക്കോടതിയിൽ അപ്പീൽ നൽകി. ഒക്ടോബർ 15ന് ഹൈക്കോടതി അപ്പീൽ തീർപ്പാകുന്നതുവരെ തടവുശിക്ഷ മരവിപ്പിച്ച് ജാമ്യം അനുവദിച്ചു. എന്നാൽ വിദേശത്തേക്ക് പോകാൻ കോടതിയുടെ മുൻകൂർ അനുമതി വേണമെന്ന വ്യവസ്ഥയുണ്ടായിരുന്നു.

ഇതിനിടെയാണ് താൻ ദുബായിലെ ഒരു ജ്വല്ലറി ഗ്രൂപ്പിൽ ജോലി ചെയ്യുന്നുണ്ടെന്നും അവിടെ ജോലിയിൽ പ്രവേശിക്കാൻ വിദേശത്തേക്ക് പോകേണ്ടതുണ്ടെന്നും ചൂണ്ടിക്കാട്ടി തച്ചങ്കരി ജാമ്യവ്യവസ്ഥയിൽ ഇളവ് തേടി ഹൈക്കോടതിയെ സമീപിച്ചത്.

ഇവിടെയാണ് കോടതി ചില ചോദ്യങ്ങൾ ഉയർത്തിയത്. ശിക്ഷാ കാലയളവിൽ ആരോഗ്യപ്രശ്നങ്ങൾ ചൂണ്ടിക്കാട്ടി ചികിത്സ തേടിയ ഒരാൾക്ക് ജാമ്യം ലഭിച്ച ഉടൻ വിദേശത്ത് പോയി ജോലി ചെയ്യാൻ എങ്ങനെ സാധിക്കുമെന്നായിരുന്നു കോടതിയുടെ ചോദ്യം.

തുടർന്ന് പൂജപ്പുര സെൻട്രൽ ജയിൽ സൂപ്രണ്ടിനോട് തച്ചങ്കരിയുടെ ജയിൽവാസത്തിനിടയിലെ ചികിത്സാ വിവരങ്ങൾ ഉൾപ്പെടുന്ന റിപ്പോർട്ട് സമർപ്പിക്കാൻ കോടതി നിർദേശിച്ചു.

ജയിൽ സൂപ്രണ്ട് സമർപ്പിച്ച മെഡിക്കൽ റിപ്പോർട്ടിൽ ഹൃദയസംബന്ധമായ അസുഖങ്ങളും ബൈപാസ് ശസ്ത്രക്രിയ നടത്തിയതുമടക്കമുള്ള വിവരങ്ങളുണ്ടായിരുന്നു.

എന്നാൽ റിപ്പോർട്ട് പരിശോധിച്ച കോടതി മറ്റൊരു കാര്യം ചൂണ്ടിക്കാട്ടി. തച്ചങ്കരി ജയിലിൽ പ്രവേശിച്ച ദിവസം മുതൽ പുറത്തിറങ്ങിയ ദിവസം വരെ ആശുപത്രിയിൽ അഡ്മിറ്റായിരുന്നുവെന്നും ഒരു ദിവസം പോലും ജയിലിൽ കഴിഞ്ഞിട്ടില്ലെന്നുമാണ് കോടതി നിരീക്ഷിച്ചത്.

ജയിലിൽ പോകുമ്പോൾ രോഗം, പുറത്തിറങ്ങിയാൽ വിദേശത്ത് പോയി ജോലി ചെയ്യാനുള്ള ആരോഗ്യം! ഈ വൈരുധ്യം അംഗീകരിക്കാനാകില്ലെന്ന് ജസ്റ്റിസ് എ. ബദറുദീൻ വാക്കാൽ വ്യക്തമാക്കി.

കോടതിക്ക് മുന്നിൽ നുണകൾ ആവർത്തിക്കരുതെന്നും ഇത്തരത്തിലുള്ള രീതികൾ ഗൗരവമായി കാണുമെന്നും കോടതി മുന്നറിയിപ്പ് നൽകി. ഇതേ നിലപാട് തുടരുകയാണെങ്കിൽ ജാമ്യം റദ്ദാക്കാനുള്ള നടപടികളിലേക്ക് കടക്കേണ്ടിവരുമെന്നും വ്യക്തമാക്കി.

മെഡിക്കൽ രേഖകൾ വിശദമായി പരിശോധിച്ചശേഷം വാദം കേൾക്കാനാണ് കോടതിയുടെ തീരുമാനം. കേസ് വീണ്ടും നവംബർ 12ന് പരിഗണിക്കും.

അതേസമയം, തച്ചങ്കരിക്കെതിരായ അനധികൃത സ്വത്ത് സമ്പാദനക്കേസിലെ അപ്പീൽ ഇപ്പോഴും ഹൈക്കോടതിയുടെ പരിഗണനയിലാണ്. ജാമ്യം ലഭിച്ചതുകൊണ്ട് കുറ്റവിമുക്തനായിട്ടില്ല. അതുപോലെ, ജാമ്യം റദ്ദാക്കുന്നതായും കോടതി ഇപ്പോൾ ഉത്തരവിട്ടിട്ടില്ല.

മുൻ പൊലീസ് മേധാവിയുടെ വിദേശയാത്രാ അനുമതിക്കായുള്ള ഹർജിയിൽ ഇനി ഹൈക്കോടതി എന്ത് തീരുമാനമെടുക്കും? നവംബർ 12ലെ കോടതി നടപടികളിലേക്കാണ് ഇനി ശ്രദ്ധ.