കുതിച്ചുയർന്ന് പച്ചക്കറി വില. തുടർച്ചയായ വർധനവിന് പിന്നാലെയാണ് വീണ്ടും വില കൂടിയത്. വെളുത്തുള്ളിയും ഇഞ്ചിയും നൂറ് രൂപ കടന്നു. ഇഞ്ചി കിലോയ്‌ക്ക്‌ 125 രൂപയും വെളുത്തുള്ളിക്ക് 170 രൂപയുമായി. മാസങ്ങളുടെ വ്യത്യാസത്തിലാണ് ഇഞ്ചിയുടെ വില ഇരട്ടിയായത്. ‌‌

ഓണക്കാലത്ത് സവാള വില 35 രൂപയായിരുന്നത് ഇപ്പോൾ 52 രൂപയായി. ചെറിയുള്ളി– 92, ബീൻസ്– 90, പച്ചമുളക്– 33 എന്നിങ്ങനെയാണ് വർധിച്ചത്. ബീൻസും ഇഞ്ചിയുമെല്ലാം വിവിധ ഗുണനിലവാരമുള്ളവ വിപണിയിലുണ്ട്. ഗുണമേന്മ കൂടിയ ഇഞ്ചിക്ക് 150 രൂപ വില. ബീൻസിന് നൂറ് രൂപയും.

26 കിലോയുടെ ഒരുപെട്ടി തക്കാളിക്ക് 1000 രൂപയാണ് ഹോൾസെയിൽ വില. ചില്ലറ വിൽപ്പനശാലകളിലേക്ക് എത്തുമ്പോൾ ഇത് 30 ശതമാനത്തോളം വർധിക്കും. ഒറ്റദിനം കൊണ്ട് 300 രൂപയാണ് ഒരുപെട്ടിക്ക് വർദ്ധിച്ചത്. വില കൂടിയതിന്റെ ഞെട്ടലിലാണ് കച്ചവടക്കാരും.

അതേസമയം, ഗുണ്ടൽപേട്ട് ഉൾപ്പെടെയുള്ള സ്ഥലങ്ങളിൽ വില കുറവാണ്‌. സവാള– 35, ചെറിയുള്ളി– 60, വെളുത്തുള്ളി– 80, ബീൻസ്– 50, ഇഞ്ചി– 80, തക്കാളി– 35, പച്ചമുളക്– 26 എന്നിങ്ങനെയാണ് ഗുണ്ടൽപേട്ടിലെ വില. സംസ്ഥാനത്തെത്തുമ്പോൾ മിക്കതിനും ഇരട്ടി വിലയാണ് ഈടാക്കുന്നത്.