വീട്ടില്‍ കുഴഞ്ഞുവീണ ഗൃഹനാഥന്റെ മരണം കഴുത്തില്‍ ബെല്‍റ്റ് മുറുക്കി ശ്വാസംമുട്ടിച്ചാണെന്ന് കൊലപാതകമെന്ന് സ്ഥിരീകരിച്ചതോടെ ഭാര്യയെ അറസ്റ്റുചെയ്തതിന് പിന്നാലെ അന്വേഷണം കൂടുതല്‍ പേരിലേക്ക്. വെള്ളിമണ്‍ വ്‌ലാവേത്ത് രാജുമന്ദിരത്തില്‍ രാജുവാണ് (56) കൊല്ലപ്പെട്ടത്. സംഭവത്തില്‍ ഭാര്യ ലേഖാമേരിയെ (48)യാണ് അറസ്റ്റ് ചെയ്തത്േ. ലേഖയ്ക്ക് കൊലപാതകം ഒറ്റയ്ക്ക് ചെയ്യാനാകില്ലെന്ന നിഗമനത്തിലാണ് പൊലീസ്. ഇവരുടെ ആണ്‍സുഹൃത്ത് നിരീക്ഷണത്തിലാണ്. ഇയാളെ വീണ്ടും ചോദ്യം ചെയ്യുമെന്നാണ് പൊലീസ് അറിയിക്കുന്നത്.

പ്രാഥമിക പോസ്റ്റ് മോര്‍ട്ടം റിപ്പോര്‍ട്ടില്‍ കഴുത്ത് ശക്തമായി മുറുക്കിയതിനെ തുടര്‍ന്നാണ് മരണമെന്ന് കണ്ടെത്തിയിരുന്നു. തുടര്‍ന്ന് ലേഖാമേരിയെ കസ്റ്റഡിയിലെടുത്തു. കഴുത്തില്‍ ബെല്‍റ്റ് മുറുക്കി ശ്വാസംമുട്ടിച്ചാണ് കൊലപ്പെടുത്തിയതെന്ന് ചോദ്യം ചെയ്യലില്‍ ലേഖാമേരി സമ്മതിച്ചു. ഇതിനെത്തുടര്‍ന്നായിരുന്നു അറസ്റ്റ്.

കഴിഞ്ഞ വെള്ളിയാഴ്ച പുലര്‍ച്ചെ 5.30 ഓടെ വീട്ടില്‍ കുഴഞ്ഞുവീണെന്ന് പറഞ്ഞാണ് ഭാര്യയും ബന്ധുക്കളും രാജുവിനെ കുണ്ടറയിലെ സ്വകാര്യ ആശുപത്രിയിലെത്തിച്ചത്. അപ്പോഴേയ്ക്കും മരിച്ചിരുന്നു. ആശുപത്രി അധികൃതര്‍ അറിയിച്ചതിനെ തുടര്‍ന്ന് കുണ്ടറ പൊലീസ് നടത്തിയ പ്രാഥമിക പരിശോധനയിലാണ് രാജുവിന്റെ കഴുത്തിലെ പാടുകള്‍ ശ്രദ്ധയില്‍പ്പെട്ടത്. ബന്ധുവിന്റെ മൊഴിയിലാണ് അസ്വാഭാവിക മരണത്തിന് കേസെടുത്തത്.

രാജു സ്ഥിരമായി വഴക്കുണ്ടാക്കുകയും തന്നെ മര്‍ദ്ദിക്കുകയും ചെയ്തിരുന്നതായാണ് ലേഖാമേരി പൊലീസിന് മൊഴി നല്‍കിയത്. അടുത്തിടെ രാജുവിന് ലഭിച്ച കുടുംബസ്വത്ത് തന്റെ പേരിലേയ്ക്ക് മാറ്റണമെന്ന് ആവശ്യപ്പെട്ടെങ്കിലും രാജു നിരസിച്ചു. ഇതേച്ചൊല്ലിയുണ്ടായ തര്‍ക്കമാണ് കൊലപാതകത്തിലേക്ക് നയിച്ചതെന്നാണ് ലേഖാമേരിയുടെ മൊഴി. നിലവില്‍ ലേഖാമേരി റിമാന്‍ഡില്‍ കഴിയുകയാണ്.