ഇക്കഴിഞ്ഞ ഫെബ്രുവരിയിലാണ് താരങ്ങളായ രശ്മിക മന്ദാനയും വിജയ് ദേവരകൊണ്ടയും വിവാഹിതരായത്. നിരവധി ആരാധകരുള്ള താരങ്ങളാണ് ഇരുവരും. നേരത്തെ പ്രണയത്തിലാണെന്ന അഭ്യൂഹങ്ങള്‍ വന്നിരുന്നെങ്കിലും ഇരുവരും ഇത് പരസ്യമായി തുറന്നുസമ്മതിച്ചിരുന്നില്ല.

ഇപ്പോഴിതാ തങ്ങളുടെ പ്രണയം രഹസ്യമായിവച്ചതിന് പിന്നിലെ കാരണം വെളിപ്പെടുത്തിയിരിക്കുകയാണ് താരങ്ങള്‍. പുതിയ ചിത്രമായ രണബലിയുടെ പ്രൊമോഷന്റെ ഭാഗമായി നല്‍കിയ അഭിമുഖത്തിലാണ് രശ്മികയും വിജയ്‌യും മനസ് തുറന്നത്. പിടിക്കപ്പെടാന്‍ ഇത് ഒളിച്ചുകളിയല്ലെന്നും ഇക്കാര്യത്തില്‍ എന്തെങ്കിലും പറയേണ്ടതുണ്ടെന്ന് തനിക്ക് തോന്നിയിരുന്നില്ലെന്നും വിജയ് ദേവരക്കൊണ്ട പറഞ്ഞു.

എട്ട് വര്‍ഷമായി രശ്മികയെ അറിയാം. ആദ്യം സഹതാരമായിരുന്നു. പിന്നെ സുഹൃത്തായി. പതിയെ പ്രണയത്തിലേയ്ക്ക് കടന്നു. അതിന് ശേഷം ഇപ്പോള്‍ തന്റെ ഭാര്യയായെന്നും വിജയ് പറഞ്ഞു. അതേസമയം, തങ്ങളുടെ ബന്ധം ഒരു എന്റര്‍ടെയ്ന്‍മെന്റിന് വേണ്ടിയുള്ളതായിരുന്നില്ലെന്ന് രശ്മിക വ്യക്തമാക്കി. തങ്ങളുടെ ബന്ധം തങ്ങളുടേത് മാത്രമാണ്. മറച്ചുവക്കാന്‍ ആഗ്രഹിക്കുന്ന കാര്യങ്ങള്‍ പുറത്തുള്ളവരോട് പറയണമെന്നില്ലെന്നും രശ്മിക പ്രതികരിച്ചു.