കൊട്ടാരക്കരയിൽ മൊബൈൽ ടവറിൽ അതിക്രമിച്ചു കയറി നെറ്റ്‌വർക്ക് കണക്ഷനുകൾ വിച്ഛേദിച്ച സംഭവത്തിൽ പുത്തൂർ സ്വദേശിയും പ്രാദേശിക ഡി.വൈ.എഫ്.ഐ നേതാവുമായ അരുണിനെതിരെ കൊട്ടാരക്കര പോലീസ് കേസെടുത്തു. ടവർ കമ്പനിയുമായുള്ള സാമ്പത്തിക തർക്കത്തെത്തുടർന്നാണ് കഴിഞ്ഞ ഒക്ടോബർ 31-ന് അരുൺ ടവറിൽ കയറി അതിക്രമം കാട്ടിയത്.

കൊട്ടാരക്കര പുത്തൂർ ഭാഗത്ത് പ്രവർത്തിക്കുന്ന ഇൻഡസ് മൊബൈൽ ടവറിലാണ് അരുൺ അതിക്രമം നടത്തിയത്. ഇവിടെയുണ്ടായിരുന്ന പ്രധാന പവർ കണക്ഷനുകൾ ഓഫ് ചെയ്തതോടെ കൊട്ടാരക്കര, പെരുങ്കുളം, നെടുവത്തൂർ, കോട്ടത്തല, ഗാന്ധിമുക്ക്, തൃക്കണ്ണമംഗലം തുടങ്ങിയ പ്രദേശങ്ങളിലെല്ലാം മൊബൈൽ നെറ്റ്‌വർക്ക് പൂർണ്ണമായും തടസ്സപ്പെട്ടു.

മുമ്പ് ടവർ സൈറ്റുകളിൽ ഡീസൽ ഫിൽ ചെയ്യുന്ന ജോലി ചെയ്തിരുന്ന ആളായിരുന്നു പ്രതിയായ അരുൺ. ഇതുമായി ബന്ധപ്പെട്ട് തനിക്ക് ലഭിക്കാനുള്ള പണം കമ്പനി മുഴുവനായും നൽകിയില്ലെന്ന വിരോധത്തിലാണ് ഇയാൾ ടവറിൽ കയറി കണക്ഷൻ വിച്ഛേദിച്ചത്. നെറ്റ്‌വർക്ക് തകരാറിലായതിനെ തുടർന്ന് കമ്പനിക്ക് വലിയ സാമ്പത്തിക നഷ്ടമാണ് ഉണ്ടായിരിക്കുന്നത്. കമ്പനി നൽകിയ പരാതിയുടെ അടിസ്ഥാനത്തിലാണ് കൊട്ടാരക്കര പോലീസ് ഇപ്പോൾ നിയമനടപടികൾ സ്വീകരിച്ചിരിക്കുന്നത്.