പാവം മിണ്ടാപ്രാണിയാണെന്ന് പോലും നോക്കാതെ ക്രൂരത. പരാതിക്കാരിയുടെ വീട്ടിലെ വളർത്തുനായയ്ക്ക് വിഷം നൽകി കൊന്നു. പിന്നാലെ സംഭവം ചോദ്യം ചെയ്തതിലുള്ള വിരോധത്തെ തുടർന്ന് വീട്ടിൽ അതിക്രമിച്ചുകയറി അസഭ്യം പറയുകയും ഭീഷണിപ്പെടുത്തുകയും ചെയ്ത കേസിൽ പ്രതി അറസ്റ്റിൽ. പൂഴിക്കാട് കുമ്പുകാട്ട് തെക്കേതിൽ വീട്ടിൽ സാമുവൽ കുട്ടിയുടെ മകൻ ബിജു എസ്. (53) ആണ് പന്തളം പോലീസിന്റെ പിടിയിലായത്. അടൂർ ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പൂഴിക്കാട് ദക്ഷിണാലയം വീട്ടിൽ സുബിത സഞ്ജിത്തിന്റെ പരാതിയിലാണ് നടപടി. സുബിതയുടെ വീട്ടിലെ വളർത്തുനായയെ പ്രതിയും സുഹൃത്തുക്കളും ചേർന്ന് വിഷം നൽകി കൊലപ്പെടുത്തുകയായിരുന്നു എന്ന് ആരോപിക്കുന്നു. ഈ ക്രൂരകൃത്യത്തെക്കുറിച്ച് പരാതിക്കാരിയുടെ സഹോദരൻ നേരിട്ട് ചോദ്യം ചെയ്തതാണ് പ്രതിയെ പ്രകോപിപ്പിച്ചത്. ഇതിലുള്ള കടുത്ത വിരോധമാണ് പിന്നീട് വീട്ടിൽ അതിക്രമം കാട്ടാൻ ഇയാളെ പ്രേരിപ്പിച്ചത്.
കഴിഞ്ഞ നവംബർ 7-ന് രാത്രി 8.30-ഓടെ പ്രതി കൂട്ടാളികളോടൊപ്പം പരാതിക്കാരിയുടെ വീട്ടിലെത്തി അസഭ്യം പറയുകയും ഭീഷണിപ്പെടുത്തുകയും ചെയ്തു. ഇതിനിടെ പരാതിക്കാരുടെ നേരെ കയ്യേറ്റം ഉണ്ടാവുകയും മുഖത്തടിക്കുകയും ചെയ്തെന്നാണ് ഔദ്യോഗിക പരാതിയിലുള്ളത്. സംഭവത്തെ തുടർന്ന് സുബിത നൽകിയ പരാതിയുടെ അടിസ്ഥാനത്തിൽ പന്തളം പോലീസ് ഉടൻതന്നെ കേസ് രജിസ്റ്റർ ചെയ്ത് അന്വേഷണം ആരംഭിക്കുകയായിരുന്നു.

തുടർന്ന് നടത്തിയ ശക്തമായ അന്വേഷണത്തിനൊടുവിൽ നവംബർ 8-ന് രാത്രിയോടെയാണ് പ്രതിയെ പോലീസ് പിടികൂടിയത്. ഭാരതീയ ന്യായ സംഹിതയിലെ (ബി.എൻ.എസ്) വിവിധ വകുപ്പുകൾ പ്രകാരമാണ് ഇയാൾക്കെതിരെ കേസെടുത്തിട്ടുള്ളത്. പന്തളം പോലീസ് സ്റ്റേഷൻ എസ്.എച്ച്.ഒ. അബിൻ പ്രസാദിന്റെ നേതൃത്വത്തിൽ എസ്.സി.പി.ഒമാരായ ആന്റണി, വിനീത്, അൻവർഷ, സി.പി.ഒ കൃഷ്ണലാൽ എന്നിവരടങ്ങിയ സംഘമാണ് പ്രതിയെ പിടികൂടി നിയമത്തിന് മുന്നിൽ എത്തിച്ചത്.