ഇരുപത്തിയൊന്നുകാരൻ സനോജിനെ പെൺസുഹൃത്തിന്റെ വീടിന് സമീപത്തെ പൊട്ടക്കിണറ്റിൽ മരിച്ച നിലയിൽ കണ്ടെത്തിയ സംഭവത്തിൽ അന്വേഷണം ഊർജ്ജിതമാക്കി പോലീസ്. കേസിൽ ശാസ്ത്രീയ പരിശോധനകൾക്ക് ശേഷമായിരിക്കും വിശദമായ നടപടികളിലേക്ക് കടക്കുകയെന്ന് പോലീസ് വ്യക്തമാക്കി. കിണറ്റിൽ നിന്ന് മൂന്നാം ഘട്ട പരിശോധനയിൽ കണ്ടെടുത്ത സനോജിന്റെ മൊബൈൽ ഫോണും ഭക്ഷണപ്പൊതിയും അടിയന്തരമായി ഫോറൻസിക് പരിശോധനയ്ക്ക് അയക്കും. അതേസമയം, മുൻപ് രണ്ടുതവണ വെള്ളം വറ്റിച്ച് പരിശോധിച്ചിട്ടും കണ്ടെത്താനാകാത്ത മൊബൈൽ ഫോൺ ഇപ്പോൾ കിണറ്റിൽ നിന്ന് ലഭിച്ചതിൽ വൻ അട്ടിമറിയുണ്ടെന്ന് സനോജിന്റെ കുടുംബം ആരോപിക്കുന്നു. തെളിവ് നശിപ്പിക്കാൻ പ്രതികൾ ഫോൺ പിന്നീട് കൊണ്ടിട്ടതാണെന്നാണ് ബന്ധുക്കളുടെ ആക്ഷേപം. ആദ്യഘട്ടത്തിൽ കേസന്വേഷിച്ച കാഞ്ഞിരംകുളം പോലീസിന് ഗുരുതര വീഴ്ച പറ്റിയെന്ന പരാതി ഉയർന്നതിനെ തുടർന്ന് കേസ് നിലവിൽ ബാലരാമപുരം സി.ഐക്ക് കൈമാറിയിരിക്കുകയാണ്. വിരലടയാള വിദഗ്ദ്ധരുടെയും സൈബർ സെല്ലിന്റെയും റിപ്പോർട്ടുകൾ പുറത്തുവരുന്നതോടെ കേസിൽ കൂടുതൽ വ്യക്തത വരുമെന്നാണ് പ്രതീക്ഷിക്കുന്നത്.