‌ഇന്ത്യക്കെതിരായ ഏകദിന പരമ്പരയിലെ അവശേഷിക്കുന്ന രണ്ട് മത്സരങ്ങൾക്ക് മുന്നോടിയായി ന്യൂസിലൻഡിന് വീണ്ടും പരിക്ക് തിരിച്ചടിയാകുന്നു. പേസർമാരായ ലോക്കി ഫെർഗൂസനും ബ്ലെയർ ടിക്നറും മൂന്നും നാലും ഏകദിനങ്ങളിൽ കളിക്കില്ല. വലതുകാലിലേറ്റ പരിക്കിനെ തുടർന്നാണ് ഫെർഗൂസൺ പുറത്തായത്. ഇന്ത്യക്കെതിരായ ട്വന്റി20 പരമ്പരയ്ക്കിടെയാണ് താരത്തിന് പരിക്കുപറ്റിയത്.

വെല്ലിങ്ടണിൽ നടന്ന രണ്ടാം ഏകദിനത്തിനിടെ ഹെൽമെറ്റിൽ പന്തുകൊണ്ട ടിക്നറിന് പരിക്കേറ്റിരുന്നു. താരത്തിന് പകരക്കാരനായി മാറ്റ് ഫിഷറിനെ ഇറക്കുകയും ചെയ്തു. ഐസിസിയുടെ നിർദേശപ്രകാരമുള്ള ഏഴ് ദിവസത്തെ വിശ്രമകാലം പൂർത്തിയാക്കാത്തതിനാൽ അടുത്ത രണ്ട് മത്സരങ്ങളിലും ടിക്നറിന് കളിക്കാനാകില്ല.

പേസർമാരുടെ അഭാവം നികത്താനായി ബൗളിങ് ഓൾറൗണ്ടർ ക്രിസ്റ്റ്യൻ ക്ലാർക്കിനെ ന്യൂസിലൻഡ് ടീമിൽ ഉൾപ്പെടുത്തിയിട്ടുണ്ട്. മൂന്നാം ഏകദിനത്തിന് മുന്നോടിയായി താരം ടീമിനൊപ്പം ചേരും. നേരത്തെ തന്നെ അവസാന രണ്ട് മത്സരങ്ങൾക്കുള്ള ടീമിൽ ക്ലാർക്കിനെ ഉൾപ്പെടുത്തിയിരുന്നു. മാറ്റ് ഹെൻറിയുടെ തിരിച്ചുവരവിലാണ് ന്യൂസിലൻഡിന്റെ പ്രതീക്ഷ. നാലാം ഏകദിനത്തിൽ കളിക്കാനാകുമെന്ന പ്രതീക്ഷയിലാണ് താരം. വലതുതുടയിലെ പേശികൾക്കേറ്റ പരിക്കാണ് ഹെൻറിയെ പുറത്തിരുത്തിയത്. രണ്ടാം ട്വന്റി20 മത്സരത്തിനിടെയായിരുന്നു പരിക്ക്. ഏകദിന പരമ്പരയ്ക്ക് മുന്നോടിയായി ഡെവൺ കോൺവേയ്ക്കൊപ്പം കൂട്ടിയിടിച്ചും ഹെൻറിക്ക് പരിക്കേറ്റിരുന്നു.മൂന്നാം ഏകദിനത്തിന് പിന്നാലെ ന്യൂസിലൻഡ് ടെസ്റ്റ് ടീമിനൊപ്പം ചേരാനിരുന്ന ഹെൻറിയും കൈൽ ജാമിസണും നാലാം ഏകദിനത്തിലും ടീമിനൊപ്പം തുടരും.