കൊച്ചി കാക്കനാട്ട് അമിതവേഗതയിലെത്തിയ സ്വകാര്യ ബസ് ഇടിച്ച് ഇൻഫോപാർക്ക് ജീവനക്കാരി അക്ഷര മരണപ്പെട്ട ദാരുണമായ സംഭവം കേരളക്കരയെ ഒന്നടങ്കം നടുക്കിയിരിക്കുകയാണ്. വിധി കാത്തുവെച്ച ക്രൂരമായ യാദൃച്ഛികതകൾ പങ്കുവെച്ചുകൊണ്ട് അക്ഷരയുടെ ഭർത്താവ് വരുൺ സുനിൽ ഫെയ്സ്ബുക്കിൽ കുറിച്ച ഹൃദയഭേദകമായ വരികൾ ഇപ്പോൾ സോഷ്യൽ മീഡിയയിൽ വലിയ രീതിയിൽ ചർച്ചയാകുന്നു. കൃത്യം മൂന്ന് വർഷങ്ങൾക്ക് മുൻപ് ഇതേ തീയതിയിലാണ് മാട്രിമോണി വഴി താൻ ആദ്യമായി അക്ഷരയെക്കുറിച്ച് അറിയുന്നത് എന്നും, ഒടുവിൽ തന്നെ തനിച്ചാക്കി അവൾ മടങ്ങിയതും അതേ ദിവസം തന്നെയെന്നുമുള്ള വരുണിന്റെ വാക്കുകൾ വായിക്കുന്നവരുടെ നെഞ്ച് തകർക്കുന്നതാണ്.