പെരുന്ന സുബ്രഹ്മണ്യസ്വാമി ക്ഷേത്രത്തിലെ ആന 'പെരുന്ന ശ്രീവള്ളി' ചരിഞ്ഞു. ഇന്ന് രാവിലെയായിരുന്നു അന്ത്യം. 1976 ഒക്ടോബർ 28ന് സ്‌കന്ദഷഷ്ഠി ദിനത്തിലാണ് ശ്രീവള്ളിയെ ക്ഷേത്രത്തിൽ നടയ്ക്കിരുത്തുന്നത്. പുഴവാത് ചിറയിൻ വീട്ടിൽ കമലാസനനാണ് ആനയെ വഴിപാടായി സമർപ്പിച്ചത്.

'വള്ളിയമ്മ' എന്നാണ് പ്രദേശവാസികൾ സ്നേഹത്തോടെ ആനയെ വിളിച്ചിരുന്നത്. പെരുന്ന ക്ഷേത്രത്തിലെ ഉത്സവത്തിന്റെ എട്ടാം ദിവസം സുബ്രഹ്മണ്യസ്വാമിയുടെ തിടമ്പേറ്റിയിരുന്നത് ശ്രീവള്ളിയാണ്. പെരുന്ന ക്ഷേത്രത്തിലെയും നാടിന്റെയും അഭിമാനമായ ശ്രീവള്ളിക്ക് 'ഷൺമുഖപ്രിയ ഗജറാണി' എന്ന ബഹുമതി നൽകി ദേവസ്വവും നാട്ടുകാരും ആദരിക്കുകയും ചെയ്തിട്ടുണ്ട്.

ആനയുടെ ഭൗതികശരീരം പൊതുദർശനത്തിനുശേഷം വനംവകുപ്പിന്റെയും ദേവസ്വത്തിന്റെയും നിർദേശപ്രകാരം ഔദ്യോഗിക ചടങ്ങുകളോടെ സംസ്കരിക്കും.