പാണ്ടന്‍ നായുടെ പല്ലിന്‌ ശൗര്യം പണ്ടേ പോലെ ഫലിക്കുന്നില്ല എന്നത്‌ എല്‍ഡിഎഫിന്‌ ഒരു ശാപമായി മാറുകയാണ്‌. കൊടിവച്ച സമരങ്ങള്‍ക്ക്‌ നേതൃത്വം നല്‍കിയിട്ടുള്ള സിപിഎമ്മിന്റെ ധൃതിപിടിച്ചുള്ള നിലപാടുകളാണ്‌ ഇപ്പോഴത്തെ പല സമരങ്ങളും പൊളിഞ്ഞതെന്നാണ്‌ എല്‍ഡിഎഫിലെ പല ഘടക കക്ഷികളും ആരോപിക്കുന്നത്‌.
അടുത്ത കാലത്ത്‌ എല്‍ഡിഎഫ്‌ ചെയ്‌ത സമരങ്ങളെല്ലാം സോളാറും മുഖ്യമന്ത്രിയുടെ രാജിയുമായിരുന്നു. എന്നാല്‍ സെക്രട്ടറിയേറ്റ്‌ ഉപരോധം ഫലം കാണുന്നതിന്‌ മുമ്പ്‌ നിര്‍ത്തിയത്‌ രൂക്ഷ വിമര്‍ശനത്തിന്‌ കാരണമായി. അത്‌ കഴിഞ്ഞ്‌ മുഖ്യമന്ത്രിയെ തടയലായി. കണ്ണൂരില്‍ മുഖ്യന്ത്രിയുടെ നെഞ്ചില്‍ ഏറ്‌ കിട്ടിയതോടെ ആഹ്വാനം നല്‍കിയ നേതാക്കള്‍ പോലും എറിഞ്ഞവരെ തള്ളിപ്പറഞ്ഞു. അങ്ങനെ ആകെ നാണക്കേടായി. അവിടെയും മുഖ്യമന്ത്രി ഹീറോയും സമരം ചെയ്‌ത പാര്‍ട്ടിക്കാര്‍ സീറോയും ആയി.

ഇതെല്ലാം ഒന്ന്‌ കെട്ടടങ്ങിയപ്പോഴാണ്‌ മുഖ്യമന്ത്രിയുടെ വീട്ടില്‍ പോയി തടയാനായി ക്ലിഫ്‌ ഹൗസ്‌ ഉപരോധം ആരംഭിച്ചത്‌. എങ്ങനെയായിരിക്കണം ഉപരോധ സമരം എന്നതു സംബന്ധിച്ച്‌ മുന്നണിക്കിടയില്‍ തന്നെ ആശയക്കുഴപ്പമായി.
ഇതിനിടയില്‍ ആരെ തടയാനാണോ പാര്‍ട്ടിക്കാര്‍ ഉദ്യേശിച്ചത്‌ ആ മുഖ്യമന്ത്രി മിക്കപ്പോഴും ജനസമ്പര്‍ക്കവുമായി തിരുവനന്തപുരത്തിനു വെളിയില്‍ കറങ്ങിയത്‌ സമരക്കാരെ കൂടുതല്‍ വെട്ടിലാക്കി.
എങ്ങനെ ഉപരോധ സമരം അവസാനിപ്പിക്കുമെന്ന ചിന്തയിലായിരിക്കുന്ന സമയത്താണ്‌ ഒരു വീട്ടമ്മ രംഗത്തെത്തിയത്‌.

മുന്‍മന്ത്രിയായ വി. സുരേന്ദ്രന്‍ പിള്ളയ്‌ക്കും സിപിഎം ജില്ല സെക്രട്ടറി കടകംപള്ളി സുരേന്ദ്രനും നേരെ യുവതി തട്ടിക്കേറി. ചാനലുകാരുടെ മുമ്പില്‍ നേതാക്കള്‍ വല്ലാതായി. ആ അരിശം തീര്‍ക്കാന്‍ നേതാക്കള്‍ പോലീസിന്‌ നേരെ തട്ടിക്കേറി. സിനിമ സ്റ്റെലില്‍ നേതാക്കന്മാര്‍ കത്തികയറിയപ്പോള്‍ പാവപ്പെട്ട പോലീസ്‌ ഉന്നത ഉദ്യോഗസ്ഥന്‍ ശരിക്കും ചമ്മി. എന്തു ചെയ്യാം കേട്ടല്ലേ പറ്റൂ.

സംഭവം ഇങ്ങനെ
ഉപരോധം നടക്കുന്ന ദേവസ്വം ബോര്‍ഡ് ജങ്ഷനിലായിരുന്നു സംഭവം. ഉപരോധ സ്ഥലത്തേക്ക് പ്രവര്‍ത്തകര്‍ വരാന്‍ വൈകിയത് കൊണ്ട് നേതാക്കള്‍ മാത്രമേ സ്ഥലത്തുണ്ടായുളളു. സ്‌കൂട്ടറില്‍ ക്ലിഫ് ഹൗസിന് പിറകിലേക്കുളള റോഡിലേക്ക് പോകാനായെത്തിയ വീട്ടമ്മയ്ക്ക് പൊലീസ് ബാരിക്കേഡ് കാരണം പോകാനായില്ല.

ഇതോടെ സമരം മൂലം ജനങ്ങള്‍ക്കാണ് ബുദ്ധിമുട്ടെന്ന് പറഞ്ഞുകൊണ്ട് വീട്ടമ്മ നേതാക്കളോട് കയര്‍ത്തു. ഇതോടെ നേതാക്കളില്‍ ചിലര്‍ പൊലീസിനും മറ്റു ചിലര്‍ പരാതി പറഞ്ഞ സ്ത്രീയ്ക്കും നേരെ തിരിഞ്ഞു.

ഇതിനിടെ നേതാക്കളില്‍ ചിലര്‍ സ്ത്രീ സരിതയുടെ ബന്ധുവാണോ എന്ന പരാമര്‍ശം നടത്തി. അതോടെ വീണ്ടും ശകാര വര്‍ഷം നടത്തി വീട്ടമ്മ പോയി.ശകാരത്തില്‍ പ്രകോപിതരായ നേതാക്കള്‍ പൊലീസിന് നേരെ തിരിഞ്ഞ്  അരിശം മുഴുവന്‍ തീര്‍ത്തു. ബാരിക്കേഡ് വെച്ച് സമരക്കാരെ തടയുന്ന പൊലീസാണ് ജനങ്ങളെ എതിരാക്കുന്നതെന്നായിരുന്ന നേതാക്കളുടെ പരാതി.

ഉപരോധ നേതാക്കള്‍ക്കെതിരെ ഒരു വീട്ടമ്മ ഒറ്റയ്‌ക്ക്‌ പൊരുതിയതിന്‌ വന്‍ ജന പിന്തുണയാണ്‌ ലഭിക്കുന്നത്‌. ഇതോടെ വെട്ടിലായിരിക്കുന്നത്‌ എല്‍ഡിഎഫാണ്‌. കാരണം ക്ലിഫ്‌ ഹൗസിന്‌ സമീപത്തുള്ള 500ലധികമുള്ള വീട്ടുകാര്‍ക്ക്‌ വഴി നടക്കാന്‍ പറ്റുന്നില്ല. നാളെ മുതല്‍ ഈ അഞ്ഞൂറോളം വീട്ടമ്മമാരെ സംഘടിച്ച്‌ ഉപരോധ സമരത്തിനെതിരായി സമരം ചെയ്യുമെന്നാണ്‌ ഈ യുവതി പറയുന്നത്‌. അതേസമയം ഈ വീട്ടമ്മമാരും തങ്ങളോടൊപ്പം സമരം ചെയ്യുന്നതിനെ സ്വാഗതം ചെയ്യുമെന്നാണ്‌ കടകംപള്ളി സുരേന്ദ്രനും പറയുന്നത്‌. അങ്ങനെയെങ്കിലും പോലീസ്‌ ബാരിക്കേട്‌ എടുത്തു മാറ്റട്ടെ!
ഇതൊക്കെ കാണുമ്പോള്‍ പൊട്ടിച്ചിരിക്കുന്ന ഒരാളുണ്ട്‌. സാക്ഷാല്‍ ഉമ്മന്‍ചാണ്ടി. രാജിയുമില്ല, പൂടയുമില്ല... സമരം ചെയ്‌തവര്‍ നാണക്കേടിലുമായി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha