ഫോണിന്‌ പിന്നാലെ മദ്യം, ജയില്‍ വീണ്ടും വിവാദത്തില്‍; മദ്യവും സുലഭമാണെന്ന്‌ കണ്ടെത്തല്‍
കേരളത്തിലെ ജയിലുകളില്‍ ആധുനിക സ്‌മാര്‍ട്ട്‌ ഫോണുകള്‍ സുലഭമാണെന്ന കണ്ടെത്തലിന്‌ പിന്നാലെ മദ്യവും സുലഭമാണെന്ന്‌ കണ്ടെത്തല്‍. പാലക്കാട്ടാണ്‌ സംഭവം. ജുഡീഷ്യല്‍ കസ്റ്റഡിയില്‍ ഇരിക്കെ വെട്ടേറ്റ്‌ മരിച്ച വിചാരണതടവുകാരന്റെ രക്തത്തിലാണ്‌ മദ്യത്തിന്റെ അംശം രാസപരിശോധനയില്‍ കണ്ടെത്തിയത്‌. പാലക്കാട്‌ സ്‌പെഷ്യല്‍ സബ്‌ ജയിലില്‍ നിന്നും കോടതിയിലേക്ക്‌ കൊണ്ടുപോകുമ്പോഴാണ്‌ കുഴല്‍ മന്ദം സ്വദേശി പ്രകാശന് വെട്ടേറ്റത്‌. മൂന്നുമാസമായി ജയിലിലായിരുന്നു പ്രകാശന്.
അയല്‍വാസിയായ ശിവദാസനെ വെട്ടിക്കൊന്ന കേസിലാണ്‌ പ്രകാശന് തടവ്‌ശിക്ഷ അനുഭവിച്ചിരുന്നത്‌.
22 പോലീസുകാര്‍ നോക്കിനില്‍ക്കെയാണ്‌ പാലക്കാട്‌ കോട്ടക്ക്‌ സമീപമുള്ള ചെക്ക്‌ പോസ്റ്റിന്‌ അരികില്‍ പ്രകാശനെ വെട്ടിക്കൊന്നത്‌. മൃതദേഹം രാസപരിശോധനയ്‌ക്ക്‌ വിധേയമാക്കിയപ്പോഴാണ്‌ മദ്യത്തിന്റെ അംശം കണ്ടെത്തിയത്‌. കോടതിയിലേയ്‌ക്ക്‌ കൊണ്ടുപോകുമ്പോള്‍ പ്രകാശന് മദ്യപിച്ചിരിക്കാനാണ്‌ സാധ്യത. ജയിലില്‍ നിന്നും കോടതിയിലേയ്‌ക്ക്‌ പോകുമ്പോള്‍ മദ്യപിക്കണമെങ്കില്‍ മദ്യം നല്‍കിയത്‌ പോലീസുകാരായിരിക്കണം.
കേരളത്തിലെ ജയിലുകളില്‍ മദ്യം സുലഭമാണെന്ന റിപ്പോര്‍ട്ടുകള്‍ നേരത്തെയുണ്ട്‌. തടവുകാരെ കോടതികളില്‍ എത്തിക്കുമ്പോള്‍ ബന്ധുക്കളും സുഹൃത്തുക്കളും മദ്യം നല്‍കാറുണ്ടെന്ന്‌ ജയില്‍ അധികൃതര്‍ പറയുന്നു. തിരുവനന്തപുരം ജില്ലാ കോടതി വളപ്പിലെ മൂത്രപ്പുരയില്‍ നിന്നും കണ്ടെത്തിയ മദ്യക്കുപ്പികള്‍ വിചാരണക്കെത്തുന്ന തടവുകാര്‍ ഉപയോഗിക്കുന്നതാണെന്ന്‌ അടുത്തിടെ കോടതി ശിരസ്‌തദാര്‍ മനുഷ്യാവകാശ കമ്മീഷനെ അറിയിച്ചിരുന്നു. എന്നാല്‍ കോടതികളിലെത്തുമ്പോള്‍ മാത്രമല്ല ജയിലിനുള്ളിലും മദ്യം ലഭിക്കുന്നുണ്ടെന്നാണ്‌ പാലക്കാട്‌ സംഭവം തെളിയിക്കുന്നത്‌. ഫേസ്‌ബുക്ക്‌ വിവാദത്തിന്‌ പിന്നാലെ കുഴല്‍മന്ദം പ്രകാശന്റെ മദ്യപാനവും തിരുവഞ്ചൂരിനെ പിടിച്ചു കുലുക്കാന്‍ ഇടയുണ്ട്‌. ഇതു സംബന്ധിച്ച്‌ ഉന്നതതല അന്വേഷണം നടക്കാനിടയുണ്ടെന്നാണ്‌ ആഭ്യന്തരവകുപ്പിലെ ഉന്നതര്‍ നല്‍കുന്ന സൂചന.
https://www.facebook.com/Malayalivartha
